Кўплаб блокбастер ва драмалардаги роллари туфайли машҳур бўлган америкалик актёр ва продюсер Том Круз 3 июль куни 62 ёшга тўлди. Круз касбига содиқлиги билан танилган — у хавфли трюкларни дублёрларсиз ўзи бажаради. Ўзининг узоқ фаолияти давомида у “Оскар”га номзод ва “Олтин глобус” ғолиби сифатида яна кўплаб мукофотларга сазовор бўлди.
Болалиги, ёшлиги, асосий роллари
Том Круз Нью-Йоркнинг Сиракюс шаҳрида муҳандис ва ўқитувчи оиласида туғилган. У актёрликка илк қадамларини 10 ёшида мактаб театр клубида қўйган. Болалигида тишлари қийшиқ, ўзига ишонмайдиган йигит бўлиб, турли мультфильм ва кино қаҳрамонларига қизиқар, уларнинг овозига моҳирона тақлид қилиб, онаси ва опа-сингилларини кулдирарди.
Ўрта мактаб ўқувчиси сифатида у Оҳайё штатининг Синсиннати шаҳридаги франсискан семинариясида ўқишга боради, аммо уни тугатолмайди. 18 ёшида у Нью-Йоркда официант бўлиб ишлайди, кечки пайт актёрлик дарсларига қатнайди. Бир оз вақт ўтгач, Круз Лос-Анжелесга кўчиб ўтади, шу ерда унинг ажойиб карьераси бошланади. Ёш актёрнинг биринчи муҳим кино лойиҳаси ҳарбий мактаб курсантлари ҳақидаги “Курсантлар” драмаси эди. Кейин режиссёр Френсис Форд Коппола томонидан ўсмирлардан иборат икки тўданинг кураши ҳақидаги “Четлаштирилганлар” фильмида суратга тушади.
Актёр карьерасининг чўққиси — “Вампир билан интервью”, “Уддалаб бўлмас топшириқ” ва “Топ Ган” жанговар фильмлари, “Магнолия”, “Ванилранг осмон”, “Сўнгги самурай” драмалари ва бошқа кўплаб фильмлар ҳисобланади.
Крузнинг энг машҳур жанжаллари
Том Круз иштирок этган жанжаллардан бири пандемия даврида “Уддалаб бўлмас топшириқ” фильмининг еттинчи қисмини суратга олиш пайтида содир бўлади. Актёр суратга олиш майдонида хавфсизлик чораларига риоя этишни қатъий талаб қилади ва мулоқот пайтида ниқоб тақмаган суратга олиш гуруҳи аъзоларига норозилигини билдиради. Круз икки ходимга қаттиқ гапиради ва бошқаларни қоидаларга риоя қилмаслик ишдан бўшатишга олиб келиши мумкинлиги ҳақида огоҳлантиради.
Том Круз ўзининг саентология (диний таълимот бўлиб, унга кўра одамлар инсон қобиғига қамалган ва ўзларининг келиб чиқишини унутган ўлим билмас ўзга сайёралик мавжудотлардир)га алоқадорлигини очиқ тан олади.
Том Круз 1987 йилда Мими Рожерсга уйланади, бироқ уларнинг никоҳи уч йилдан сўнг — Мими 33 ёшга тўлганида тугайди. Кейинчалик учрашиб юрган, аммо ўша пайтда 33 ёшда бўлган Николь Кидман билан ажрашади. Кети Ҳолмс билан ҳам худди шундай ҳолат юз беради — унинг никоҳи ҳам у 33 ёшида тугайди. Қизиғи шундаки, собиқ рафиқаларининг ҳар бири аввалгисидан 11 ёшга кичик эди. Бу тасодифлар турли хил назарияларни келтириб чиқарди: баъзилар 33 ёш масонларнинг энг юқори даражаси билан боғлиқ бўлган алоҳида аҳамиятга эга эканлигини кўрсатади. Аммо бошқалар буни Круз бажарадиган маълум бир маросимнинг бир қисми деб ҳисоблайди.
Крузнинг никоҳлари ва ажралишлари
Крузнинг биринчи хотини актриса Мими Рожерс бўлиб, актёрни айнан у саентология билан таништирган. Мими билан ажрашгач, Круз 1990 йилда 23 ёшли Николь Кидманга уйланади. Эр-хотин Изабелла Жейнни ва Коннор Энтони исмли болаларни асраб олади. 2001 йилда Круз хотинига ажрашмоқчи эканини айтади. Шундан сўнг у уч йил давомида бошқа актриса Пенелопа Круз билан учрашиб юради. Британия-эронлик навбатдаги актриса Назанин Бониади билан муносабатлари ҳам узоқ давом этмайди.
2005 йилда Том Круз актриса Кети Ҳолмс билан учрашишни бошлайди, 2006 йилда эса эр-хотиннинг Сури исмли қизи туғилади, аммо Ҳолмс 2012 йилда ажрашиш учун ариза беради. 2015 йилда актёр яна уйланмоқчи экани ҳақида хабар тарқалади — бу сафар шахсий ёрдамчиси Эмили Томасга. Аммо 2017 йилда матбуот Том Круз ва унинг “Уддалаб бўлмас топшириқ 6” фильмидаги ҳамкасби Ванесса Кирби ўртасидаги ишқий муносабатлар ҳақида эълон қилади.
Россиялик аёл билан романтикаси
2023 йилда 61 ёшли Том Круз 36 ёшли россиялик аёл — “Ягона Россия” партиясининг собиқ депутати Ринат Хайровнинг қизи Элсина билан ишқий муносабатда бўлганликда гумон қилинган. Бу ҳақда Daily Mail ёзганди. ОАВ хабарларига кўра, жуфтлик Гросвенор хиёбонидаги зиёфатда танишган. 2024 йил февраль ойида Круз Хайрова билан муносабатларини расман эълон қилади. Шундай қилиб, жуфтлик биргаликда хайрия ташкилотини қўллаб-қувватлаш учун тантанали зиёфатда иштирок этади. Бу беш юлдузли Раффле меҳмонхонасида бўлиб ўтади. Аммо тез орада, Сун газетасига кўра, Голливуд актёри Хайрова билан ажрашади. Нашр суҳбатдошининг таъкидлашича, Том ва Элсина ўртасидаги муносабатлар “шунчаки тугаган”.
Изоҳ (0)