Ko‘plab blokbaster va dramalardagi rollari tufayli mashhur bo‘lgan amerikalik aktyor va prodyuser Tom Kruz 3-iyul kuni 62 yoshga to‘ldi. Kruz kasbiga sodiqligi bilan tanilgan — u xavfli tryuklarni dublyorlarsiz o‘zi bajaradi. O‘zining uzoq faoliyati davomida u “Oskar”ga nomzod va “Oltin globus” g‘olibi sifatida yana ko‘plab mukofotlarga sazovor bo‘ldi.
Bolaligi, yoshligi, asosiy rollari
Tom Kruz Nyu Yorkning Sirakyus shahrida muhandis va o‘qituvchi oilasida tug‘ilgan. U aktyorlikka ilk qadamlarini 10 yoshida maktab teatr klubida qo‘ygan. Bolaligida tishlari qiyshiq, o‘ziga ishonmaydigan yigit bo‘lib, turli multfilm va kino qahramonlariga qiziqar, ularning ovoziga mohirona taqlid qilib, onasi va opa-singillarini kuldirardi.
O‘rta maktab o‘quvchisi sifatida u Ohayo shtatining Sinsinnati shahridagi fransiskan seminariyasida o‘qishga boradi, ammo uni tugatolmaydi. 18 yoshida u Nyu Yorkda ofitsiant bo‘lib ishlaydi, kechki payt aktyorlik darslariga qatnaydi. Biroz vaqt o‘tgach, Kruz Los-Anjelesga ko‘chib o‘tadi, shu yerda uning ajoyib karyerasi boshlanadi. Yosh aktyorning birinchi muhim kino loyihasi harbiy maktab kursantlari haqidagi “Kursantlar” dramasi edi. Keyin rejissyor Frensis Ford Koppola tomonidan o‘smirlardan iborat ikki to‘daning kurashi haqidagi “Chetlashtirilganlar” filmida suratga tushadi.
Aktyor karyerasining cho‘qqisi — “Vampir bilan intervyu”, “Uddalab bo‘lmas topshiriq” va “Top Gan” jangovar filmlari, “Magnoliya”, “Vanilrang osmon”, “So‘nggi samuray” dramalari va boshqa ko‘plab filmlar hisoblanadi.
Kruzning eng mashhur janjallari
Tom Kruz ishtirok etgan janjallardan biri pandemiya davrida “Uddalab bo‘lmas topshiriq” filmining yettinchi qismini suratga olish paytida sodir bo‘ladi. Aktyor suratga olish maydonida xavfsizlik choralariga rioya etishni qat’iy talab qiladi va muloqot paytida niqob taqmagan suratga olish guruhi a’zolariga noroziligini bildiradi. Kruz ikki xodimga qattiq gapiradi va boshqalarni qoidalarga rioya qilmaslik ishdan bo‘shatishga olib kelishi mumkinligi haqida ogohlantiradi.
Tom Kruz o‘zining sayentologiya (diniy ta’limot bo‘lib, unga ko‘ra odamlar inson qobig‘iga qamalgan va o‘zlarining kelib chiqishini unutgan o‘lim bilmas o‘zga sayyoralik mavjudotlardir)ga aloqadorligini ochiq tan oladi.
Tom Kruz 1987-yilda Mimi Rojersga uylanadi, biroq ularning nikohi uch yildan so‘ng — Mimi 33 yoshga to‘lganida tugaydi. Keyinchalik uchrashib yurgan, ammo o‘sha paytda 33 yoshda bo‘lgan Nikol Kidman bilan ajrashadi. Keti Holms bilan ham xuddi shunday holat yuz beradi — uning nikohi ham u 33 yoshida tugaydi. Qizig‘i shundaki, sobiq rafiqalarining har biri avvalgisidan 11 yoshga kichik edi. Bu tasodiflar turli xil nazariyalarni keltirib chiqardi: ba’zilar 33 yosh masonlarning eng yuqori darajasi bilan bog‘liq bo‘lgan alohida ahamiyatga ega ekanligini ko‘rsatadi. Ammo boshqalar buni Kruz bajaradigan ma’lum bir marosimning bir qismi deb hisoblaydi.
Kruzning nikohlari va ajralishlari
Kruzning birinchi xotini aktrisa Mimi Rojers bo‘lib, aktyorni aynan u sayentologiya bilan tanishtirgan. Mimi bilan ajrashgach, Kruz 1990-yilda 23 yoshli Nikol Kidmanga uylanadi. Er-xotin Izabella Jeynni va Konnor Entoni ismli bolalarni asrab oladi. 2001-yilda Kruz xotiniga ajrashmoqchi ekanini aytadi. Shundan so‘ng u uch yil davomida boshqa aktrisa Penelopa Kruz bilan uchrashib yuradi. Britaniya-eronlik navbatdagi aktrisa Nazanin Boniadi bilan munosabatlari ham uzoq davom etmaydi.
2005-yilda Tom Kruz aktrisa Keti Holms bilan uchrashishni boshlaydi, 2006-yilda esa er-xotinning Suri ismli qizi tug‘iladi, ammo Holms 2012-yilda ajrashish uchun ariza beradi. 2015-yilda aktyor yana uylanmoqchi ekani haqida xabar tarqaladi — bu safar shaxsiy yordamchisi Emili Tomasga. Ammo 2017-yilda matbuot Tom Kruz va uning “Uddalab bo‘lmas topshiriq 6” filmidagi hamkasbi Vanessa Kirbi o‘rtasidagi ishqiy munosabatlar haqida e’lon qiladi.
Rossiyalik ayol bilan romantikasi
2023-yilda 61 yoshli Tom Kruz 36 yoshli rossiyalik ayol — “Yagona Rossiya” partiyasining sobiq deputati Rinat Xayrovning qizi Elsina bilan ishqiy munosabatda bo‘lganlikda gumon qilingan. Bu haqda Daily Mail yozgandi. OAV xabarlariga ko‘ra, juftlik Grosvenor xiyobonidagi ziyofatda tanishgan. 2024-yil fevral oyida Kruz Xayrova bilan munosabatlarini rasman e’lon qiladi. Shunday qilib, juftlik birgalikda xayriya tashkilotini qo‘llab-quvvatlash uchun tantanali ziyofatda ishtirok etadi. Bu besh yulduzli Raffle mehmonxonasida bo‘lib o‘tadi. Ammo tez orada, Sun gazetasiga ko‘ra, Gollivud aktyori Xayrova bilan ajrashadi. Nashr suhbatdoshining ta’kidlashicha, Tom va Elsina o‘rtasidagi munosabatlar “shunchaki tugagan”.
Izoh (0)