Исроил бош вазири Биньямин Нетаньяху унинг ҳукумати Ғазодаги урушни давом эттириш ва ҲАМАСни йўқ қилиш мажбуриятини олганини маълум қилди. Бу ҳақда бош вазирнинг сўзларидан иқтибос келтирган ҳолда Al Arabiya нашри хабар берди.
Манбада айтилишича, Исроил Эрон томонидан қўллаб-қувватланаётгани даъво қилинган гуруҳ йўқ қилинмагунча ва урушнинг бошқа барча мақсадларига эришилмагунча ҲАМАСга қарши ҳаракатларини давом эттиради. Бош вазир идораси ҳам махсус баёнотида вазирнинг сўзларини тасдиқлаган.
Нетаньяху вазирлар маҳкамасининг ҳафталик йиғилишида Исроилнинг мақсадлари ҳақида такрорий ҳисобот эълон қилган. Ҳукуматнинг биринчи галдаги вазифалари Ғазода гаровга олинганларни озод қилиш ва бу ҳудуд Исроил учун бошқа ҳеч қачон хавф туғдирмаслигини таъминлашдан иборат эканлиги таъкидланган.
Исроил ҳукумати, шунингдек, Ғазо ва Ливан билан чегарадош ҳудудларда хавфсизликни тиклашни мақсад қилган. Ушбу ҳудудларни ташлаб кетган маҳаллий аҳолини ҳудудларга қайтариш буюрилган.
“Кимки ушбу мақсадларимизга эришишга шубҳа қилса, мен яна бир бор айтаман: бизда ушбу ғалабанинг муқобил варианти йўқ. Биз ўз ҳарбий мақсадларимизнинг барчасига эришмагунимизча урушни тугатмаймиз”, — деган Нетаньяху.
Олдинроқ, Исроил ҳукуматидаги ўзгаришларга муносабат билдирган Нетаньяху Ғазо операцияси якунланишига ишора қилган эди. Яқин ҳафталарда ҳарбийлар Рафаҳ ва Ғазо марказидан олиб чиқилиши айтилган. Бироқ Исроил етакчисининг сўнгги чақириқлари урушни яна чўзишга ишора қилмоқда.
Изоҳ (0)