Исроилликларнинг 66 фоизи Нетаньяхунинг сиёсатдан кетишини хоҳлайди — сўровнома

Исроил фуқароларининг 66 фоизи мамлакат бош вазири Биньямин Нетаньяхунинг ҳокимиятдан кетишини хоҳлайди. Бу ҳақда 28 июнь куни ўтказилган сўровнома натижаларига асосланиб, Anadolu хабар берди.

Исроил аҳолисининг учдан икки қисми бош вазирнинг истеъфосига хайрихоҳлик билдирган. Фуқаролар Нетаньяхунинг бош вазир лавозими учун янги муддатга номзодини қўйишига ҳам қарши чиқмоқда.

Сўровномада қатнашганларнинг кўпчилиги 74 ёшли Нетанҳахуни агрессив сиёсати ва мамлакат ҳаётини издан чиқаргани учун танқид қилган. Респондентларнинг 27 фоизга яқинигина вазирнинг ҳокимиятини қўллаб-қувватлаган.

Худди шу кўринишдаги яна бир сўровнома Исроилнинг Маарив газетаси томонидан ўтказилган. Ушбу сўровномада эса Миллий бирлик партияси раҳбари Бенни Гантз бош вазирликка муносиблик рейтингида Нетаньяхудан устун келган.

Биньямин Нетаньяхунинг бош вазир сифатидаги фаолияти унинг мансаб ваколатлари муддати тугаши туфайли қонуний асосга эга эмас. Олдинроқ БМТ Хавфсизлик Кенгаши вазирдан мамлакатда зудлик билан сайловлар ташкил этишни талаб қилган эди. Исроил ҳукумати бу талабни эътиборсиз қолдирган. Тель-Авив расмийлари ҲАМАС билан кетаётган уруш туфайли сайловларни ташкиллаштириб бўлмаслигини билдирган.

Маълумот ўрнида, Биньямин Нетаньяху Халқаро суд томонидан геноцидда айбланмоқда. Суд Тель-Авивга мурожаат юбориб, 6 май кунидан бери давом этаётган Рафаҳ операциясини тўхтатишни талаб қилган. Аммо Нетаньяху бошчилигидаги ҳукумат талабларни рад этган эди.