Isroil bosh vaziri Binyamin Netanyaxu uning hukumati G‘azodagi urushni davom ettirish va HAMASni yo‘q qilish majburiyatini olganini maʼlum qildi. Bu haqda bosh vazirning so‘zlaridan iqtibos keltirgan holda Al Arabiya nashri xabar berdi.
Manbada aytilishicha, Isroil Eron tomonidan qo‘llab-quvvatlanayotgani daʼvo qilingan guruh yo‘q qilinmaguncha va urushning boshqa barcha maqsadlariga erishilmaguncha HAMASga qarshi harakatlarini davom ettiradi. Bosh vazir idorasi ham maxsus bayonotida vazirning so‘zlarini tasdiqlagan.
Netanyaxu vazirlar mahkamasining haftalik yig‘ilishida Isroilning maqsadlari haqida takroriy hisobot eʼlon qilgan. Hukumatning birinchi galdagi vazifalari G‘azoda garovga olinganlarni ozod qilish va bu hudud Isroil uchun boshqa hech qachon xavf tug‘dirmasligini taʼminlashdan iborat ekanligi taʼkidlangan.
Isroil hukumati, shuningdek, G‘azo va Livan bilan chegaradosh hududlarda xavfsizlikni tiklashni maqsad qilgan. Ushbu hududlarni tashlab ketgan mahalliy aholini hududlarga qaytarish buyurilgan.
“Kimki ushbu maqsadlarimizga erishishga shubha qilsa, men yana bir bor aytaman: bizda ushbu g‘alabaning muqobil varianti yo‘q. Biz o‘z harbiy maqsadlarimizning barchasiga erishmagunimizcha urushni tugatmaymiz”, — degan Netanyaxu.
Oldinroq, Isroil hukumatidagi o‘zgarishlarga munosabat bildirgan Netanyaxu G‘azo operatsiyasi yakunlanishiga ishora qilgan edi. Yaqin haftalarda harbiylar Rafah va G‘azo markazidan olib chiqilishi aytilgan. Biroq Isroil yetakchisining so‘nggi chaqiriqlari urushni yana cho‘zishga ishora qilmoqda.
Izoh (0)