Амстердамда 33 ёшли бошпанасиз эркак, икки ёш боланинг отаси Ҳаджер Ал-Али ичида 2 минг евро бўлган ҳамённи топиб олди ва уни полиция маҳкамасига топширди. Бу ҳақда у маҳаллий De Stentor газетасига берган интервьюсида айтиб берди.
Ҳаджер Амстердам марказий вокзалида бўш пластик қути ва шиша бутилкаларни қайта ишлаш марказига топшириш учун териб юрган, сўнг тасодифан ҳамённи кўриб қолган. Унинг сўзларига кўра, ҳамёнда “кўп пул бўлгани сабабли” эгалари уни излашига амин бўлган:
“Эҳтимол, кимдир пулни фарзанди учун ёки даволаниш учун йиғиб юргандир. Балки улар ҳақиқатан ҳам шу пулга муҳтож одамдир”, — дейди Ал-Али.
Эркак ҳамённи полицияга олиб борганида, унинг эзгу амали учун “кумуш бармоқ” номли кичик мукофот ва 50 евролик совға сертификати берилди.
Бундан хабар топган GoFundMe платформаси фойдаланувчилари тез орада Ал-Али учун хайрия йиғини ташкил қилди ва унга 34 минг евро йиғиб беришди. GoFundMe саҳифасида айтилишича, эркак бир ярим йилдан бери кўчада яшайди ва ҳозирда унинг икки нафар фарзанди бор.
Ал-Али пулни уй ижарасига ҳамда ҳаётини ўз йўлига қўйишга ҳаракат қилиш учун сарфлаш ниятида. Шунингдек, саховатпеша кўплаб инсонлар унга яхши иш таклифларини ҳам берган.
Март ойида америкалик коллеж ўқувчилари мактаб қўриқчиси уйга бориши учун GoFundMe’да 20 минг доллардан кўпроқ маблағ тўплашди ва 11 йилдан бери оиласини кўрмаган қўриқчи оиласини кўришга муваффақ бўлди.
Изоҳ (0)