“Пойтахт банк” АЖ устав капиталидаги 100 фоиз акциялар пакетини БААнинг Bond Investments limited LLC компаниясига 10 миллион долларга сотиш бўйича келишувга эришилди. Бу ҳақда Давлат активларини бошқариш агентлиги маълум қилди.
Аввалроқ мазкур банк давлат улушини оммавий савдо жараёни натижасида “Экспобанк” АЖ (Россия) билан тегишли келишув имзоланган эди. Бироқ халқаро муносабатларда юзага келган вазият сабабли “Экспобанк” томонидан амалдаги келишув шартларини бажариш имконияти мавжуд эмаслиги инобатга олиниб, у ўзаро келишувга асосан бекор қилинган.
Битимни ҳуқуқий жиҳатдан тўлиқ якунлаш учун инвестор томонидан Ўзбекистон Марказий банкининг “Пойтахт банк” АЖ акцияларини сотиб олишга доир дастлабки рухсатномасини олиш талаб этилади.
Эслатиб ўтамиз, 2017 йил Ўзбекистон Марказий банки Тошкентда “Пойтахт банк” ташкил этилишини маълум қилган эди. Мазкур банк арзон кўп квартирали уйларни лойиҳалаштириш ва қуришга буюртма бериш ҳамда ипотека кредитларини ажратиш билан шуғулланиш учун очилган. 2018 йил 29 декабрь куни Марказий банк унга банк операцияларини амалга ошириш учун лицензия берган.
Изоҳ (0)