АҚШ ҳукумати Кениядаги Жаҳон озиқ-овқат дастури доирасида камбағал аҳолига ёрдам кўрсатиш учун 37 миллион доллар ажратган. Бу ҳақда Anadolu нашри хабар берди.
Манбада айтилишича, ажратилган маблағ асосан қочқинлар ва кўчирилганлар учун сарфланади. Сўнгги йилларда қўшни мамлакатларда юз берган ҳарбий можаролар шароитида Кения ҳудудига бир неча юз минг қочқин кириб келган.
Кениядаги озиқ-овқат дастури бош департаменти АҚШ ёрдамини қабул қилганини тасдиқлаган. Ушбу маблағ БМТ назорати остида тақсимланиши маълум қилинган.
Жаҳон озиқ-овқат дастурининг Шарқий Африка давлати бўйича директори Лорен Ландис маблағ тасарруфи ҳақида қисқа баёнот эълон қилган. АҚШ ёрдами Жаҳон озиқ-овқат дастури доирасида Кения қочқинлар лагерларида кунлик озиқ-овқат рационини ошириш ва 2024 йилгача иккита лагер ҳудудида нақд пул кўринишидаги ёрдам ташаббусини амалга ошириш учун сарфланиши айтилган.
“Қочқин оилалар сўнгги икки ойни жуда қийин ўтказдилар. Ҳозирда уларнинг яшаб қолиши учун зарур бўлган минимал озиқ-овқат ҳажмининг ярмигина бизда мавжуд”, — деган Ландис.
Манбада айтилишича, Дадааб ва Какумаба лагерларида молиявий ёрдам ҳисобидан рағбат тизими жорий қилинади. Аҳолини меҳнатга жалб қилиш дастури ишлаб чиқарилади.
Ҳозирда Кения ҳудудидаги иккита қочқинлар лагерида 580 минг киши бошпана сақламоқда. Ушбу лагерларга ёрдам ўтказмалари май ойида тўхтаб қолган эди,нақд пул ўтказиш май ойида вақтинча тўхтатилган эди.
Маълумотларга кўра, Кенияда 2019 йилдан бери қочқинлар ва бошпана изловчилар сони 60 фоизга кўпайган. Қочқинларнинг аксарияти Сомали, Жанубий Судан ва Конго Демократик Республикасидан кириб келган. Аҳоли кўчишининг бош омили қўшни мамлакатлардаги можаролар ва фуқаролар уруши эканлиги айтилган.
Изоҳ (0)