“Узуклар ҳукмдори”да Гендалф образини яратган актёр Иэн Маккеллен театр саҳнасидан йиқилгани сабабли касалхонага тушди

Шекспир рэпертуарининг устаси, “Ғаройиб одамлар” фильмида мутант Магнето ва “Узуклар ҳукмдори” трилогиясида Гендалф образи билан машҳурлик қозонган актёр Иэн Маккеллен Лондон марказий театрида спектакл саҳнасидан йиқилиб, касалхонага ётқизилди. Бу ҳақда BBC хабарларига таяниб Правила Жизни хабар бермоқда.

Аниқланишича, 85 ёшли британиялик актёр муштлашув саҳнасини ижро этиш вақтида мувозанатни йўқотиб, йиқилган. У Ноэл Кауард театрида “Player Kings” спектаклида иштирок этаётган бўлган.

Мазкур ҳолат гувоҳлари SkyNews’га айтишича, актёр биринчи қаторда ўтирган аудитория ёнига тушиб кетган.

“Маккеллен микрофони ёниқ бўлгани учун ёрдам сўраб қичқиргани барчага эшитилди”, — деди томошабинлардан бири.

Актёрни тиббиёт носилкасида олиб кетишди. Театр маъмурияти томошабинлардан театр биносини тарк этишни сўрашди ва чипталар учун тўланган пул тез орада қайтарилишини ваъда қилишди.

Актёрнинг қандай жароҳат олгани маълум эмас. Театр вакиллари актёрнинг кайфияти яхши эканини ва тез орада соғайиб, кейинги ҳафта саҳнага қайтишини маълум қилди.