Дэниел Редклифф биринчи марта энг яхши актёр номинациясида “Тони” мукофотини қўлга киритди

Актёр Дэниел Редклифф кино ва театр фаолиятидаги биринчи “Тони” мукофотига сазовор бўлди. Соврин “Merrily We Roll Along” (Хурсандчилик билан олға борамиз) мусиқий спектаклидаги энг яхши эркак роли учун топширилди. Бу ҳақда “Правила жизни” нашри хабар берди.

“Тони” — Америка театри, шу жумладан, мусиқали театр соҳасидаги ютуқлар учун ҳар йили бериладиган мукофот бўлиб, асосан Бродвей (Нью Ёрк)да қўйиладиган спектакллар учун топширилади.

“Гарри Поттер” франшизаси тугагач, кино соҳасидаги карьерам қандай давом этишини тасаввур ҳам қила олмас эдим. Сўнг театрга кириб келдим ва спектаклларда рол ўйнай бошладим. Аммо келажакда мени нималар кутаётганини билмас эдим, — дейди актёр.

Ўтган йили мен “Wird Al” спектаклида иштирок этдим, бу ажойиб тажриба эди, — дея давом этди Редклифф.

Актёрнинг сўзларига кўра, доимий бир хил образни узоқ йиллар давомида гавдалантириш нотўғри бўлган. Дэниел доим бошқа лойиҳаларда иштирок этишни ва ўзини турли жанрларда синаб кўришни истаган.

Мукофотни қўлга олар экан, актёр ота-онасига, рафиқаси Эрин Даркка, ўғли Жонга, шунингдек, спектакль жамоасига ўз миннатдорчилигини билдирди.

“Merrily We Roll Along” мусиқий асари 1934 йилда Жорж Кауфман ва Мосс Хартнинг худди шу номли пьесаси асосида яратилган. Мусиқали театрда уч нафар йигитнинг дўстлиги йигирма йил давомида қандай ривожланиб келгани ҳақида ҳикоя қилинади. Воқеалар ривожи тескари хронологияда ёритилади.

Мазкур спектакль Лондон ва Нью Ёркда бўлиб ўтган ва бугунги кунда Бродвейнинг Гудзон театрида намойиш этилмоқда. “Merrily We Roll Along”нинг намойиши жорий йил 7 июль кунигача давом этади.