Хонанда Даврон Эргашев айни пайтда оиласи билан Америка Қўшма Штатларида истиқомат қилмоқда. У “Дарё” мухбири билан суҳбатда Америкага нима сабабдан кетгани, у ердаги ҳаётнинг афзалликлари ҳамда камчиликлари ҳақида сўзлаб берди.
“Бу ерда тил ўрганиш осонроқ”
Айни пайтда оиламиз билан АҚШнинг Пенсилвания штати Филаделфия шаҳрида яшаяпмиз. Кўпчилик ‘Бутунлайга кетдингизми?’ деб сўраяпти. Йўқ, бутунлайга келмадим. Фарзандларимни шу ерда ўқитиб, тил ўргатишни мақсад қилганман. Бу ерда тил ўрганиш осонроқ. Фарзандларим ҳозирда мактабда ўқишмоқда. Ўзимнинг ҳам шу ерда ижод қилиб, клиплар олиш ниятим бор. Лекин бу ерга асосан фарзандларим учун келдим. Ҳар бир ота-она фарзандининг сифатли таълим олиши учун шароит яратиб бергиси келади. Вақти келиб Тошкентга қайтамиз, иншаоллоҳ.
“Ўзбекистондаги яхши ишингизни ташлаб Америкага кетдингизми, деб сўрашяпти. Яширмайман, Ўзбекистонда ишим зўр, Аллоҳга шукур. Мухлисларим ҳалигача ёзишади. ‘Ака, тўйимга сизни чақиришни ният қилганман’, дейишади. Уларга Америкага бир умрга кетмаганимни айтяпман. Тўйларга бориб, келиб, ҳозирча икки давлат ўртасида яшаймиз.
“Америкага келиш ко′пчиликнинг орзуси”
Америкага бориб ўқиб, ишлашни кўпчилик орзу қилади. Айтишадику, “Америка сеҳрли диёр”, деб. Америкага юртдошларимиз асосан Green Card билан келишади. Уларнинг орасида, айниқса самарқандликлар кўп. Ўзим ҳам қандай қилиб Green Card’ни ютишларига қизиқиб уларга савол бердим. Айтишларича, уларда вилоят бўйича ҳамма бутун оила аъзолари билан, уйма-уй ўйнашар экан. Шунинг учун самарқандликлар Green Card лотереясида Ўзбекистондаги бошқа вилоятларга қараганда кўпроқ ютишаркан. Масалан, Тошкентда ҳамма ёппасига ўйнамайди, шунинг учун камдан кам ҳолларда ютишади. Ўзимга келсам, оиламиз билан ҳаммамизга туристик виза тақдим этилди, шунинг учун келиб маълум муддат бу ерда яшаб кўришга қарор қилдик.
Америкадаги ҳаётнинг афзалликлари ҳақида
“Америкада ҳаёт жуда ҳам гўзал. Бироқ ҳеч қаер ўз Ватанингизга етмайди. Бир нарсани алоҳида таъкидлашим керак, бу ерда ҳаво ниҳоятда тоза. Филаделфияда ўрмон, арчазор, дарахтзорлар кўп бўлгани учун ҳаво тозалиги яққол сезилади. Баҳорда бу ерлар жуда гўзал бўлар экан, ҳаммаёқ ям-яшил. Ҳаттоки, тўғрисини айтсам бу ерда чанг деган нарса йўқ, ҳавоси оригинал. Оиламга, фарзандларимга бу шаҳар жудаям ёқди, яхши яшаяпмиз, Худога шукур.
Бегона давлатда яшашнинг ўзига яраша қийинчиликлари ҳам бўлади албатта. Уларга сабр билан чидаяпмиз. Бу биринчи ўринда Ватан, ота-онамиз ва жигарларимиз соғинчи, қолаверса ўзимнинг ҳақиқий шинаванда мухлисларимни соғиндим. Бориб ижод қилгим келяпти. Яхши қўшиқлар ёзганмиз. Ёзда уларга Майамида клиплар олишни ният қилганман. 2002 йилда Шаҳноз билан куйлаган ‘Сени кўрсам қанийди?’, деб номланган дуэтимизнинг ўзим айтган қисмини бошқатдан ижро этдим. Ушбу янгилик мухлисларимга манзур бўлади, деган умиддаман. Ўша қўшиққа янги клип ҳам олинади. Мухлисларим ижодни йиғиштирдингизми, деб ҳам савол беришяпти. Йўқ, санъатни тўхтатганим йўқ. Худо хоҳласа Ўзбекистонга бориб, мухлисларимизга янги ижод намуналарини тақдим этаман.
Изоҳ (0)