Ортиқча вазндан халос бўлиш учун парҳез тутган вақтда ҳам қора шоколад ейиш тақиқланмайди, чунки диета вақтида ширинликларни бутунлай чеклаш шарт эмас. Аммо шундай қандолат маҳсулотлари борки, улар ўта юқори калорияли ва зарарли ширинликлар ҳисобланади. Бундай маҳсулотлардан умуман воз кечиш лозим.
Кремли вафли
Албатта, вафлилар уйда табиий маҳсулотлардан фойдаланган ҳолда бўёқ ва таъм кучайтиргичсиз тайёрланса, уларда хавф йўқ. Крем ва шоколад қўшилмаган 100 грамм вафлида ўртача 490 ккал бўлади. Улардан 5,5 грамми оқсил, 22 грамми ёғ, 66 грамми углеводлардир. Асосий хавф палма ёғида бўлиб, у кўпинча дўкон вафлиларида ишлатилади. Ушбу маҳсулот соғлиқ учун зарарлидир.
Холестерин даражаси юқори бўлган аёллар гуруҳида олиб борилган тадқиқотлар шуни кўрсатдики, палма ёғини истеъмол қилгандан сўнг бу кўрсаткич бир неча бор кўтарилиб, юрак-қон томир тизимида муаммоларга олиб келади.
Шунинг учун ушбу тоифадаги маҳсулот ёрлиқларини диққат билан ўрганиб чиқиш керак. Қадоқда тозаланган, дезодоризация қилинган ўсимлик мойлари деган ёзув бўлиши мумкин. Палма ёғи дўкон жавонларида жойлашган деярли барча ун маҳсулоти ва ширинликларда ишлатилади. Шунинг учун энг яхши ечим — уй шароитида ишончли маҳсулотлардан вафли тайёрлаш.
Кўпиртирилган крем ва қаймоқли коктейллар
Бир стакан крем ва қаймоқли ширин коктейлда 1500 килокалория мавжуд. Бу кўрсаткич нонушта, тушлик ва кечки овқатнинг умумий энергетик қийматини ифодалайди. Бу каби ширинликлар сўзлашув услубида “овершейк” деб аталади. Қаймоқли коктейл таркибига кўпиртирилган қаймоқ, шоколаддан ташқари, турли печене, донат, кекс, банан, ёнғоқ, зефир каби ширинликлар қўшилиши мумкин.
Бундай қандолат маҳсулотининг асосий зарари унинг юқори калориялилиги, шакарнинг юқори концентрацияси, таркибидаги витаминлар, озуқа моддалари ва микроэлементларнинг камлигидир.
Мюсли ва донлардан тайёрланган батончиклар
Бундай ширинликлар махсус савдо расталарида — диабетик инсонлар маҳсулотлари ичида сотилгани учун фойдали газак деб қабул қилинади. Лекин улар ҳам зарарли маҳсулотлар рўйхатига киритилган. Сабаби мюсли ва донлардан тайёрланган батончиклар таркибида палма ёғи, ортиқча шакар ҳамда таъм берувчи қўшимчалар эвазига калорияси ортиб кетади ва инсон саломатлигига зарар келтиради.
Бир дона бундай батончикда тахминан 15 грамм шакар бўлиши мумкин, яъни бу 3 ош қошиқ шакарни истеъмол қилиш дегани. Баъзи ишлаб чиқарувчилар шакарни сунъий таъм берувчи билан алмаштиради, аммо бу ҳам вазиятни яхшиламайди. Ушбу маҳсулотда мавжуд бўлган шакар моддаси тўлиқ парчаланмайди, бу ошқозон-ичак трактида муаммолар келтириб чиқаради.
Кремли ширинликлар
Чиройли қути, шоколад билан қопланган, ёнғоқларга бурканган ва қаймоқ билан бойитилган кичкина конфетлар мазали бўлмаслиги мумкинми? Аммо бундай лаззат ортида саломатлик учун хавф ҳам мавжуд.
Биринчидан, 100 грамм бундай маҳсулотнинг энергетик қиймати 550 дан 623 килокалориягача бўлади. Унга тахминан 8,2 грамм оқсил, 42,7 г ёғ ва 44,4 грамм углеводлар киради. Иккинчидан, ушбу конфетлар сезилмас даражада организмда кўникиш ҳосил қилади ва ҳар куни яна конфет егингиз келади. Энг ёмони, кремли ширинликларнинг фойдали элемент ва озуқа моддалари нолга тенг.
Учинчидан, кремли қандолат маҳсулотлари қондаги шакар даражасини кўтаради ва ҳуснбузар каби тери муаммоларини ҳам келтириб чиқаради. Дарвоқе, кўп шакар ейиш инсонни қаритишини унутмаслик лозим.
Изоҳ (0)