“Ипак йўли дурдонаси” XV Тошкент халқаро кинофестивали доирасида Голливуд юлдузи Кевин Спейси иштирокида мастер-класс бўлиб ўтди.
Спейси замонамизнинг машҳур актёрларидан бири. У “Америкача гўзаллик” фильмидаги роли учун, шунингдек, “Гумондор шахс” фильми учун “Оскар” мукофотини қўлга киритган.
Кевин Спейси, шунингдек, АҚШ актёрлари гилдияси, BAFTA, Олтин глобус ва Тони мукофотлари билан тақдирланган. Унинг “House оf cards”, “Ка-Пекс сайёраси”, “Лос-Анжелес сири”, “Музокарачи”, “Девид Гейлнинг ҳаёти”, “Етти” ва энг яхши кинолари қаторига киради.
Кевин Спейсининг фестивалга ташрифи шов-шувга сабаб бўлди; Реннесанс Кино уйи зали лиқ тўлди ва йиғилганларнинг деярли ҳаммаси унга савол беришни истагида бўлишди. Бироқ вақт чеклангани сабабли барча саволларга жавоб олиш имконияти бўлмади.
Учрашув максимал даражада очиқ ўтди, Кевин барча саволларга батафсил жавоб берди. Муайян “юлдузлик” туйғуси бир зумда ғойиб бўлди, томошабинлар қаршисида бир вақтлар қийин йўлни босиб ўтган ва актёр бўлишга қарор қилган оддий одам турарди.
Мастер-класс якунига етгач залдаги томошабинлардан бири ҳаяжон билан ўз фикрларини билдириб ўтди:
“У ақл бовар қилмайдиган харизмага эга профессионал экан. У жамоат олдида ўзини қандай тутишни, нима дейишни аниқ билади ва шу билан бирга бошқа одамлар билан хушмуомала ва ҳурмат билан муносабатда бўлди. Шу билан бирга, у ҳазил қилишни ҳам яхши эплар экан ва бу борада ўзини сувда сузган ўрдакдек ҳис қилди. Учрашувдан кейин менда фақат яхши таассуротлар қолди”.
Қуйида Кевин Спейси билан учрашувда берилган энг эсда қоларли саволлар ва уларга берилган жавоблар эътиборингизга ҳавола этилади.
– Мен ёш режиссёрман, кучли кино характерини яратишда ёш авлодга қандай маслаҳат бера оласиз?
—Ҳаммаси режиссёрнинг томошабинга нимани кўрсатмоқчи эканлигини, томошабинга қандай маълумотни етказмоқчи эканлигингизни тушунишидан бошланади. Юқори сифатли фильм суратга олиш ва муваффақиятга эришиш учун барча жамоа аъзоларини йиғиш ва муаллифнинг фильм ҳақидаги ғоясини муҳокама қилиш кифоя. Режиссёрнинг вазифаси - бутун саҳнани худди картина каби кўриш, актёрлар эса режиссёр суратидаги ранглардир. Палитрани яратиш ва унга турлича жило билан бойитиш - бу юксак санъат.
– Кино соҳасидаги талабаларга қандай маслаҳат бера оласиз?
— Мамлакатингиз бой кинематография тарихига эга, шунинг учун сиз уни кўпроқ ўрганишингиз ва амалиётга татбиқ қилишингиз керак. Ҳар доим ўқинг, иложи борича кўпроқ фильмларни томоша қилинг, чунки улар сизнинг келажакдаги карьерангиз учун жуда қизиқарли ва фойдалидир.
— Қандай қилиб ҳозирги даражага эришдингиз?
— Болалигимда кўп қийинчиликларга дуч келганман. Бироқ, мен хатолардан сабоқ олдим, кино курслари ва театрларда қатнашдим. Фильмларда турли ролларни ўйнаганимдан сўнг, актёрлик бахтини ҳис қилдим ва турли образларни ўйнашга илҳом олдим. Бу менга ҳаётдаги турли муаммоларни енгишда катта ёрдам берди.
– Ўзбекистонлик қиз америкалик йирик продюсерларнинг эътиборига тушиши учун нима қилиши керак?
— Мен оддий оилада улғайган, чўққиларни забт этган инсонман. Мен профессионал актёр бўлишимга жуда ишонардим ва актёр бўлиш учун кўп ўқидим. Шунинг учун, сиз ҳам бунга ишонишингиз ва ўз устингизда қаттиқ ишлашингиз керак.
— Сиз ҳам жаҳон киносининг бошқа юлдузлари, жумладан Бред Питт, Ал Пачино, Роберт Де Ниро каби замонамизнинг энг яхши актёрларидан бирисиз. Бизга яқин ва ўрта суратларда камера қаршисида қандай туришни айтиб бера оласизми ёки кўрсата оласизми?
— Қизиқ савол. Ҳар бир актёр рол ўйнаётганда қандай ҳаракат қилса, яхши бўлишини ўзи ҳал қилиши керак, кимгадир ўхшашга ҳаракат қилиш нотўғри. Йиллар давомида бу тажриба актёрнинг ўзида шаклланади. Чунки ҳар бир актёрнинг ўз услуби, ўзига хослиги бўлиши керак. Буни бошқа бировдан ўрганмаслиги керак. Актёрликдаги энг муҳими, режиссёр маълум бир фильмда сиздан нимани хоҳлаётганини тушунишга эътибор бериш ва унга тезда жавоб қайтаришдир.
Изоҳ (0)