Арманистонда 12 июнь куни бўлиб ўтган ҳукуматга қарши намойишларда 100 дан ортиқ фуқаро жароҳатланди. Бу ҳақда Арманистон Соғлиқни сақлаш вазирлиги баёнотига асосланиб, Anadolu хабар берди.
Манбада айтилишича, чоршанба куни Арманистон парламенти биноси яқинида ҳукуматга қарши намойишлар содир бўлган. Полиция томонидан намойишни бостириш чоғида эса оммавий тартибсизликлар юзага келган.
Арманистон Соғлиқни сақлаш вазирлигининг маълум қилишича, 101 нафар фуқаро яраланган. Жароҳатланганлар орасида намойишчилар ҳам, полициячилар ҳам бор. 85 нафар фуқаро биринчи тиббий ёрдам кўрсатилгач тиббий бўлимдан чиқарилган. 16 нафар шахс эса оғир жароҳатлар билан касалхонада қолмоқда.
Парламент биноси олдига йиғилган намойишчилар мамлакат бош вазири Никол Пашинян истеъфосини талаб қилган. Оломон парламентга кириш йўлларини тўсиб қўйган.
Полиция намойишчиларни тарқатиш жараёнида шовқинли гранаталардан фойдаланган. Аммо бу тадбир тескари натижа бериб, фуқаролар полиция вакилларига ҳужум қилган.
Пашинян ва унинг вазирлар маҳкамаси истеъфоси талаб қилиниши Ереваннинг Тоғли Қорабоғ можаросида мағлубиятга учрагани билан боғлиқ. Кўпчилик арманлар бу ҳодисани миллий шармандалик деб атаган. Чунки “Иккинчи Қорабоғ уруши”дан олдин қарийб 30 йил давомида Қорабоғ Ереван назоратида бўлган.
Танқидчилар Пашинян ва унинг ҳукуматини бошқарувнинг турли соҳаларида, жумладан, иқтисодиётни бошқаришда, COVID-19 пандемиясига қарши курашда ва ваъда қилинган ислоҳотларни амалга оширмасликда айблашган. Ҳукуматда ислоҳотлар учун лаёқат ва қатъият йўқлигини танқид қилишган.
Изоҳ (0)