Armanistonda 12-iyun kuni bo‘lib o‘tgan hukumatga qarshi namoyishlarda 100 dan ortiq fuqaro jarohatlandi. Bu haqda Armaniston Sog‘liqni saqlash vazirligi bayonotiga asoslanib, Anadolu xabar berdi.
Manbada aytilishicha, chorshanba kuni Armaniston parlamenti binosi yaqinida hukumatga qarshi namoyishlar sodir bo‘lgan. Politsiya tomonidan namoyishni bostirish chog‘ida esa ommaviy tartibsizliklar yuzaga kelgan.
Armaniston Sog‘liqni saqlash vazirligining maʼlum qilishicha, 101 nafar fuqaro yaralangan. Jarohatlanganlar orasida namoyishchilar ham, politsiyachilar ham bor. 85 nafar fuqaro birinchi tibbiy yordam ko‘rsatilgach, tibbiy bo‘limdan chiqarilgan. 16 nafar shaxs esa og‘ir jarohatlar bilan kasalxonada qolmoqda.
Parlament binosi oldiga yig‘ilgan namoyishchilar mamlakat bosh vaziri Nikol Pashinyan isteʼfosini talab qilgan. Olomon parlamentga kirish yo‘llarini to‘sib qo‘ygan.
Politsiya namoyishchilarni tarqatish jarayonida shovqinli granatalardan foydalangan. Ammo bu tadbir teskari natija berib, fuqarolar politsiya vakillariga hujum qilgan.
Pashinyan va uning vazirlar mahkamasi isteʼfosi talab qilinishi Yerevanning Tog‘li Qorabog‘ mojarosida mag‘lubiyatga uchragani bilan bog‘liq. Ko‘pchilik armanlar bu hodisani milliy sharmandalik deb atagan. Chunki “Ikkinchi Qorabog‘ urushi”dan oldin qariyb 30 yil davomida Qorabog‘ Yerevan nazoratida bo‘lgan.
Tanqidchilar Pashinyan va uning hukumatini boshqaruvning turli sohalarida, jumladan, iqtisodiyotni boshqarishda, COVID-19 pandemiyasiga qarshi kurashda va vaʼda qilingan islohotlarni amalga oshirmaslikda ayblashgan. Hukumatda islohotlar uchun layoqat va qatʼiyat yo‘qligini tanqid qilishgan.
Izoh (0)