Ливандаги “Ҳизбуллоҳ” гуруҳи Исроил шимолига 13 июнь куни 150 дан ортиқ ракета учирган. Бу ҳақда Al Jazeera нашри хабар берди.
Манбада айтилишича, Ливандаги қуролли гуруҳ Исроилнинг 15 та ҳарбий объектларини нишонга олган. Тартибсиз йўналишда 150 дан ортиқ ракета учирилган.
“Ҳизбуллоҳ” расмийлари ҳужумда 30 та камикадзе дронлари ишлатилганини ҳам маълум қилган. Дронлардан асосан Исроил чегара-мудофаа иншоотларини йўқ қилишда фойдаланилган.
Исроил оммавий ахборот воситалари “Ҳизбуллоҳ” ҳужуми оқибатида камида 2 киши ҳалок бўлганини айтган. 15 та объектда кенг кўламли ёнғинлар юзага келган.
“Ҳизбуллоҳ” ҳодиса юзасидан махсус баёнот эълон қилиб, операция “Фаластин халқи ва Ғазодаги жасур ҳамда шарафли қаршилик гуруҳларини қўллаб-қувватлаш мақсадида ҳамда сионист душманнинг Жоуяда амалга оширган хунрезлигига қарши жавоб контекстида” амалга оширилганини эълон қилган.
Ливандан учирилган ракеталарнинг мўлжалга етиб бориш интенсивлиги ҳақида ҳозирча маълумот мавжуд эмас. Тель-Авив расмийлари ракеталарнинг кўпчилиги ҳаводаёқ уриб туширилганини билдирган.
Изоҳ (0)