Аргентина Миллий Конгресси биноси олдида 12 июнь куни ҳукумат сиёсатига қарши фуқаролар ва полиция ўртасида тўқнашув юзага келди. Бу ҳақда CNN нашри хабар берди.
Маълумотларга кўра, Конгресс биносида чоршанба куни президент ислоҳотлари борасида муҳокама ўтказиш учун депутатлар йиғилиши керак бўлган. Аммо ҳудудга ғазабланган оломон оқиб келиши оқибатида ҳукумат йиғини тўхтатилган.
Олдинроқ ўта либерал қарашлари билан танилган Аргентина президенти Хавьер Милей ҳукумат ўзгариши ва иқтисодий ислоҳотлар тўғрисидаги қонун лойиҳасини таклиф қилган эди. Бу ислоҳотларга кўра ижтимоий харажатлар камайтирилиши эса турли гуруҳлар ва касаба уюшмаларининг фаол норозилигини келтириб чиқарган.
Полиция Аргентина Конгресси олдида оломонни тарқатиш учун сув пуркагичлар ва кўздан ёш оқизувчи газдан фойдаланган. Намойишчилар оғир жисмлар ва буюмлар улоқтириб, полицияга қаршилик қилган.
Намойишчилар билан тўқнашувда маҳаллий телеканалга тегишли автомобиль ёқиб юборилган. Ҳодиса оқибатида шикастланган фуқаролар ҳақида маълумот мавжуд эмас.
Депутатлар палатасида аллақачон маъқулланган президент қонун лойиҳаси маъмурий, иқтисодий, молиявий ва энергетика масалалари бўйича бир йил муддатга мамлакатда фавқулодда ҳолат эълон қилишни ўз ичига олади. Бу эса ушбу соҳаларда қонун чиқарувчи орган ваколатларини Конгресс билан ҳисоблашмасдан туриб, ижроия ҳокимиятига топшириш имконини беради.
Изоҳ (0)