Испания транспорт вазирининг Аргентина президенти Хавьер Милей гиёҳванд моддалар истеъмол қилгани ҳақидаги баёноти икки давлат ўртасида жиддий дипломатик можарога олиб келди. Бу ҳақда BBC хабар берди.
Испания транспорт вазири Оскар Пуэнте Аргентина раҳбари сайловолди ташвиқоти вақтида “маълум моддалар” қабул қилганини айтди. У Аргентинада бўлиб ўтган президентлик сайловларида ғалаба қозонган Милейни АҚШ собиқ президенти Дональд Трампга қиёслади.
“Жуда ёмон одамлар борки, шунчаки ўзлиги билан энг юқори чўққига эришган. Масалан, Милей ёки Трамп”, — деди Пуэнте.
Сайлов кампанияси вақтида Милейнинг телевидениедаги чиқишларини тасвирлаган Испания вазири у қандай ҳолатда эканини: “моддаларни қабул қилишдан олдин ёки кейин” билмаслигини айтди.
Бунга жавобан Аргентина президенти администрацияси баёнот чиқарди. Унга кўра, Испания ҳозирда Милейнинг хатти-ҳаракатларини муҳокама қилишдан кўра, муҳимроқ вазифаларни, хусусан, Испания бош вазири Педро Санчеснинг рафиқасига қўйилган коррупция айбловлари билан шуғулланиши керак. Шунингдек, баёнотда Санчеснинг сиёсати Испанияда “ўлим ва қашшоқликка” олиб келгани ва “аёлларга ҳужум қиладиган ноқонуний муҳожирларни киритиш орқали аёллар учун хавф туғдиргани” таъкидланган.
Ўз навбатида, Испания Ташқи ишлар вазирлиги “икки қардош мамлакат ва халқлар ўртасидаги муносабатларга мос келмайдиган” Милей администрациясининг “асоссиз баёнотларини” рад этган.
Изоҳ (0)