Малави вице-президенти ва ҳукуматлари бўлган самолёт номаълум сабабга кўра бедарак йўқолди

Малави вице-президенти ва ҳукумат вакилларини олиб кетаётган самолёт 10 июнь куни бедарак йўқолди. Бу ҳақда мамлакат президенти офиси тарқатган хабарга асосланиб, BBC хабар берди.

Манбада айтилишича, йўқолган самолётда Малави вице-президенти Саулос Чилима ва яна тўққиз нафар ҳукумат аъзолари бўлган. Улар Душанба куни мамлакат пойтахти Лилонгведан ҳавога кўтарилган.

Расмийлар парвоздан 15 дақиқа ўтиб самолёт радарларда кўринмай қолганини ёзган. Самолёт 10 июнь куни маҳаллий вақт билан 10:00 да мамлакат шимолидаги Мзузу халқаро аэропортига қўниши керак эди.

Президент Lazarus Чаквера душанба кунги эълон қилган баёнотида қидирув-қутқарув операцияси давом этаётганини айтган.

“Аскарлар қидирув ишларини давом эттирмоқда. Мен самолёт топилгунга қадар операция давом этиши кераклиги ҳақида қатъий буйруқ бердим”, — деган мамлакат раҳбари.

Вице-президент ғойиб бўлиши ортидан мамлакат президенти Чаквера душанба оқшомига режалаштирилган Багама оролларига парвозини бекор қилган. “Оғир пайт”да ҳукумат вакилларини қатъиятли бўлишга чақирган.

Самолётнинг ғойиб бўлиш сабаби ҳозиргача аниқланмаган. Малави ахборот вазири Мосес Кункую BBCга самолётни топиш бўйича саъй-ҳаракатлар “интенсив” кетаётганини билдирган.

Вице-президент Чилима уч кун олдин вафот этган собиқ вазирлар маҳкамаси вазири Ралф Касамбаранинг дафн маросимида ҳукумат номидан иштирок этиш учун кетаётган бўлгани маълум қилинган.

• Маълумот ўрнида, вице-президент Саулос Чилима 2022 йилда ҳибсга олинган эди.
• Унга ҳукумат шартномаларини бериш эвазига пул олганлик айблови қўйилган.
• Ўтган ойда суд бу айблов учун ҳеч қандай сабаб топа олмай, вице-президентни ҳибсдан озод қилган эди.