Малави президенти Lazarus Чаквера ҳукумат амалдорларининг, шу жумладан ўзининг ҳам хорижий саёҳатларини тўхтатди. Бу ҳақда Al Jazeera хабар берди.
Президентга кўра, бу ҳаракат Жанубий Африка мамлакати иқтисодиётини тиклаш бўйича қаттиқ чораларнинг бир қисми ҳисобланади. Чаквера мамлакатда бўлмаган барча вазирларни ватанига қайтишга кўрсатма бериб, бу кейинги йилнинг март ойигача амал қилишини айтди.
“Ушбу давр мобайнида ўта зарур деб ҳисобланган ҳар қандай саёҳат менинг шахсий рухсатимни олиши учун офисимга топширилиши керак”, — деди у.
Президент бир қатор тежамкорлик чораларини, жумладан, Вазирлар Маҳкамаси аъзолари ва юқори лавозимли ҳукумат амалдорлари учун ёнилғи маблағларини 50 фоизга қисқартиришни эълон қилди.
Маҳаллий матбуотнинг хабар беришича, Чаквера тез-тез хорижга саёҳат қилгани учун танқид остига олинган. У саёҳат режаларини қисқартириш, шу жумладан, ноябрь ойи охирида Дубайдаги COP28 иқлим ўзгариши бўйича конференциядаги иштирокини бекор қилиш орқали ўрнак бўлишини айтди.
Чора-тадбирлар доирасида Чаквера молия вазирига барча давлат хизматчиларининг иш ҳақини оқилона ошириш бўйича қоидаларни йил ўрталаридаги бюджетни кўриб чиқишга киритишни топширди. У даромадлари қадрсиз бўлиб қолган ишчиларга “солиқ имтиёзлари” берилиши учун шахсий даромад солиғини қисқартиришни буюрди.
Малави ёнилғи тақчиллигига, озиқ-овқат нархининг ошишига ва валюта танқислигига олиб келган иқтисодий инқирозга қарши курашмоқда. Ўтган ҳафта мамлакат марказий банки маҳаллий валютани АҚШ долларига нисбатан қарийб 30 фоизга қадрсизлантираётганини эълон қилганди.
Изоҳ (0)