Бирлашган миллатлар ташкилоти Хавфсизлик кенгаши Ғазо секторида ўт очишни тўхтатиш ва гаровдагиларни озод этиш бўйича АҚШ резолюциясини қўллаб-қувватлади. Бу ҳақда “ТАСС” хабар берди.
Хавфсизлик кенгашининг 15 аъзосидан 14 нафари ҳужжатга овоз берган, Россия эса бетараф қолган. АҚШ таклиф қилган резолюция етти банддан иборат бўлиб, улардан биринчиси ҲАМАСни келишувни қабул қилишга ҳамда “барча томонларни ҳеч қандай шартлар ва кечиктирмасдан унинг қоидаларини тўлиқ бажаришга чақиради”.
Бундан ташқари, агар сулҳ бўйича маслаҳатлашувлар олти ҳафтадан кўпроқ вақтга чўзилса, “ўт очишни тўхтатиш ҳам музокаралар давом этгунга қадар амалда бўлади”.
Резолюция БМТга аъзо барча мамлакатларни келишувни амалга оширишни қўллаб-қувватлашга чақиради, Исроил ва Фаластин ўртасидаги зиддиятни икки давлатнинг тинч-тотув яшаши асосида ҳал этиш тарафдори эканини яна бир бор тасдиқлайди.
АҚШнинг оташкесим режаси
31 май куни АҚШ президенти Жо Байден уч босқичдан иборат янги тинчлик битими лойиҳаси шартларини эълон қилди. Биринчиси олти ҳафтага мўлжалланган бўлиб, тўлиқ ўт очишни тўхтатиш, Исроил қўшинларини Ғазонинг аҳоли пунктларидан олиб чиқиб кетиш, юзлаб фаластинлик маҳбусларни қамоқдан озод қилиш эвазига ҲАМАС томонидан гаровга олинганларни озод этишни назарда тутади.
Шунингдек, ушбу даврда томонлар музокараларни бошлашлари керак ва ўзаро келишувга эришилгунга қадар сулҳ ўз кучида қолади. Иккинчи босқич барча гаровга олинганларни, жумладан, ҳарбий хизматчиларни ҳам озод қилишни назарда тутади. Учинчи босқич Ғазо секторини тиклаш ва ҳалок бўлган исроилликларнинг жасадларини яқинларига топшириш.
Изоҳ (0)