Malavi vitse-prezidenti va hukumat vakillarini olib ketayotgan samolyot 10-iyun kuni bedarak yo‘qoldi. Bu haqda mamlakat prezidenti ofisi tarqatgan xabarga asoslanib, BBC xabar berdi.
Manbada aytilishicha, yo‘qolgan samolyotda Malavi vitse-prezidenti Saulos Chilima va yana to‘qqiz nafar hukumat aʼzolari bo‘lgan. Ular Dushanba kuni mamlakat poytaxti Lilongvedan havoga ko‘tarilgan.
Rasmiylar parvozdan 15 daqiqa o‘tib samolyot radarlarda ko‘rinmay qolganini yozgan. Samolyot 10-iyun kuni mahalliy vaqt bilan 10:00 da mamlakat shimolidagi Mzuzu xalqaro aeroportiga qo‘nishi kerak edi.
Prezident Lazarus Chakvera dushanba kungi eʼlon qilgan bayonotida qidiruv-qutqaruv operatsiyasi davom etayotganini aytgan.
“Askarlar qidiruv ishlarini davom ettirmoqda. Men samolyot topilgunga qadar operatsiya davom etishi kerakligi haqida qatʼiy buyruq berdim”, — degan mamlakat rahbari.
Vitse-prezident g‘oyib bo‘lishi ortidan mamlakat prezidenti Chakvera dushanba oqshomiga rejalashtirilgan Bagama orollariga parvozini bekor qilgan. “Og‘ir payt”da hukumat vakillarini qatʼiyatli bo‘lishga chaqirgan.
Samolyotning g‘oyib bo‘lish sababi hozirgacha aniqlanmagan. Malavi axborot vaziri Moses Kunkuyu BBCga samolyotni topish bo‘yicha saʼy-harakatlar “intensiv” ketayotganini bildirgan.
Vitse-prezident Chilima uch kun oldin vafot etgan sobiq vazirlar mahkamasi vaziri Ralf Kasambaraning dafn marosimida hukumat nomidan ishtirok etish uchun ketayotgan bo‘lgani maʼlum qilingan.
- Maʼlumot o‘rnida, vitse-prezident Saulos Chilima 2022-yilda hibsga olingan edi.
- Unga hukumat shartnomalarini berish evaziga pul olganlik ayblovi qo‘yilgan.
- O‘tgan oyda sud bu ayblov uchun hech qanday sabab topa olmay, vitse-prezidentni hibsdan ozod qilgan edi.
Izoh (0)