АҚШ президенти Жо Байден Исроил ва ҲАМАС ўртасидаги ҳарбий ҳаракатларни камида олти ҳафтага тўхтатишга чақирди. Бу ҳақда Bloomberg хабар берди.
АҚШ президенти Вашингтонда Иордания қироли Абдулла II билан музокаралар якунларида тегишли чақириғини эълон қилди. У гаровга олинганларни озод қилиш учун Исроил ва ҲАМАС ўртасидаги жангларда олти ҳафталик танаффусга интилаётганини айтди ва бу шартлар кенгроқ тинчлик учун замин яратиши мумкинлигини билдирди.
Бундай пауза “Ғазога камида олти ҳафта давомида зудлик билан ва барқарор тинчлик даврини олиб келади, кейин эса биз янада мустаҳкамроқ нарсани қуришга вақт ажратишимиз мумкин”, — деди у.
Журналистларнинг ёзишича, Байденнинг баёноти Ғазода уруш бошланганидан бери энг батафсили ҳисобланади.
“Келишувларнинг асосий элементлари стол устида ва АҚШ бу амалга ошиши учун ҳамма нарсани қилади”, — дейди Оқ уй раҳбари.
Байден ва Абдулла II Исроилнинг Рафаҳ шаҳрига ҳужуми билан боғлиқ хавотирлар кучайиб бораётган бир пайтда учрашди.
“Биз чеккада туриб, бу нарсалар давом этишига йўл қўя олмаймиз. Ҳозироқ узоқ муддатли оташкесим керак. Бу уруш тугаши лозим”, — дейди Иордания қироли.
Абдуллоҳ II нинг Вашингтонга ташрифи Исроил армияси 12 февраль куни бир миллиондан ортиқ одам фаластинлик бошпана топган Рафаҳга ҳужум қилган пайтга тўғри келди.
“АҚШ, унинг араб ҳамкорлари ва бошқа давлатлар зудлик билан икки давлат ечими асосида адолатли ва кенг қамровли тинчликка олиб келадиган сиёсий уфқни яратишга ҳаракат қилиш, бу орқали ўт очишни тўхтатиш бўйича саъй-ҳаракатларни кучайтириши керак”, — деди Абдулла II.
АҚШ Марказий разведка бошқармаси ва Исроилнинг жосуслик агентлиги раҳбарлари 13 февраль куни Миср ва Қатарнинг юқори даражадаги мулозимлари билан учрашиб, музокаралар ўтказиши кутилмоқда. Учрашув Қоҳирада бўлиши ўтиши маълум қилинган.
Сўнгги пайтлар Байден Исроил бош вазири Биньямин Нетаньяхуни танқид қилишни кучайтириб, уни тинч аҳолини ҳимоя қилиш учун кўпроқ ҳаракат қилишга ундамоқда. Байден Исроилга Ғазога кўпроқ ёрдам беришга рухсат бериш учун босим ўтказган ва Исроил фуқаролар хавфсизлигини таъминлаш учун “ишончли ва амалга ошириладиган режа” бўлмасдан Рафаҳга бостириб кирмаслиги кераклигини айтган.
“Уларни ҳимоя қилиш керак. Биз бу борада бошиданоқ аниқ эдик. Фаластинликларнинг Ғазодан мажбуран кўчирилишига қаршимиз”, — деган Байден.
Байден ва Нетаньяху 11 февраль куни телефон орқали гаплашди ва Исроил бош вазири тинч аҳолини Рафаҳ ҳудудидан олиб чиқиш режаси устида ишлаётганини айтди. Бироқ, тегишли даъволарига қарамай, 12 февраль куни Рафаҳга зарбалар берди.
Тинчлик таъминланса, Байденнинг айтишича, Фаластин маъмурияти ислоҳот қилиши керак.
“ҲАМАСнинг Ғазо устидан назорати тугагач, улар тинчликни қабул қиладиган ва ҲАМАС ҳамда бошқа гуруҳларга бошпана бермайдиган давлат қуришга тайёргарлик кўришлари керак”, — деди у.
Изоҳ (0)