Хитой ва Покистон қўшма баёнот эълон қилиб, “Толибон”ни инклюзив ҳукумат тузишга ва терроризмга қарши курашишга чақирди. Бу ҳақда Hasht-e Subh Daily нашри хабар берди.
Манбада айтилишича, Покистон бош вазири Шаҳбоз Шарифнинг Хитойга тўрт кунлик ташрифи давомида баёнот эълон қилинган. Покистон ва Хитойнинг “Толибон” ҳукуматига талаблари умумий эканлиги айтилган.
Икки томон қўшма баёнотда “Толибон”дан мўтадил сиёсат олиб бориш орқали қўшниларини ҳурмат қилишни сўраган. Мамлакатлар билан ҳарбий ҳаракатлардан қочиш ва кучга таянмаслик сўралган.
Ушбу баёнотнинг бир қисмида террористик гуруҳлар “Толибон” ҳукмронлиги остидаги ҳудуддан бошқа давлатларга қарши ҳужумларини уюштирмасликлари кераклиги қайд этилган. Тақиқланган халқаро ташкилотларга бошпана бермаслик сўралган.
Томонлар, шунингдек, 2024 йил 26 март куни Покистоннинг Хайбер-Пахтунхва вилоятида хитойлик муҳандислар карвонига уюштирилган ҳужумни қоралаб, икки давлат ўртасидаги муносабатларни заифлаштиришга қаратилган ҳар қандай уриниш беҳуда бўлишини қўшимча қилган. Пекин ва Исломобод терроризмга қарши биргаликдаги ҳамкорликни яна бир бор таъкидлаб, бу борада халқаро ҳамжамият билан ҳамкорлик қилишга тайёр эканликларини маълум қилган.
Маълумот ўрнида, Исломободдаги ҳукумат “Толибон”ни “Таҳрики Толибон” гуруҳи томонидан Покистонга уюштирилган терактларни қўллаб-қувватлашда айблаб келади. Покистон, шунингдек, “Толибон”га бўйсунувчи “Ҳаққоний тармоғи” гуруҳини ИШИД билан алоқа ўрнатишда айблаган.
Изоҳ (0)