Афғонистонда “Толибон” ҳукумати билан мулоқот ўрнатишнинг муқобил йўли йўқ ва бу минтақа манфаатларига мос келади, деди Россия ташқи ишлар вазири Сергей Лавров. Унинг сўзларига кўра, Россия Толибон инклюзив ҳукумат бўйича ўз мажбуриятларини бажармагунча уларни тан олиш ҳақида гапира олмайди.
Сергей Лавров Душанбедаги Россия—Тожикистон университетида сўзлаган нутқида шу мавзуни кўтарди. Бугун, 6 июнь куни Россия ТИВ раҳбари тожикистонлик ҳамкасби Сирожиддин Муҳриддин ва Тожикистон президенти Имомали Раҳмон билан учрашди. Муҳриддин музокаралар якунларига кўра, Москва ва Душанбе Афғонистондан келаётган таҳдидларни баҳолашда ҳамфикр эканини айтди.
“Биз Афғонистондаги вазиятга алоҳида эътибор қаратган ҳолда минтақавий хавфсизлик муаммоларини муҳокама қилдик. Биз Афғонистоннинг шимоли-шарқий вилоятларида турли террорчилик гуруҳлари сонининг кўпайиши сабабли хавфсизликка таҳдидларни баҳолашда ҳамжиҳатмиз”, — деди Тожикистон ТИВ раҳбари.
Университетда сўзлаган Сергей Лавров “Толибон” билан ишчи мулоқот ўрнатиш “минтақа хавфсизлиги ва иқтисодий тараққиёти манфаатларига, шунингдек, Афғонистон ичида миллий муросага эришиш мақсадларига мос келади”, деди.
“Бироқ айтилган шартлар бажарилмагунча, биз “Толибон” ҳукуматини расман тан олиш жараёни бошланиши ҳақида гапира олмаймиз. Айтганимдек, бу мажбуриятлар орасида этник-сиёсий жиҳатдан мувозанатли ҳукуматни шакллантириш, терроризм ва гиёҳванд моддалар савдосига қарши кураш бўйича чора-тадбирларни кучайтириш, Афғонистонда яшовчи барча халқлар, шу жумладан, тожиклар учун ҳам асосий инсон ҳуқуқларини таъминлаш киради”, — дея қўшимча қилди Россия ташқи ишлар вазири.
Изоҳ (0)