1992-yilgi terma jamoa tarkibida Olimpiya chempioni va 2008-yilgi o‘yinlarining kumush medali sovrindori Oksana Chusovitina 2028-yilgi Olimpiadada qatnashish istagini bildirdi. Bu haqda u ijtimoiy tarmoqdagi obunachilar savollariga javob berish davomida ma’lum qildi.
Avvalroq o‘zbekistonlik gimnastikachi jarohat olgani sabab 2024-yilgi Olimpiada o‘yinlariga saralash bahsi bo‘lgan Osiyo chempionatida ishtirok eta olmagani ma’lum bo‘lgan edi. Biroq sportchining so‘zlariga ko‘ra, u hali ham Parij Olimpiadasida ishtirok etish umidini yo‘qotmagan.
Fransiyaga borish imkoniyati bormi, degan savolga Chusovitina shunday javob berdi: “Imkoniyatlar bor! Agar yo‘q bo'lsa, 2028-yilda meni ko‘rasiz!”
Chusovitina 19-iyunda 49 yoshga to‘ladi. Los-Anjelesdagi navbatdagi yozgi Olimpiada o‘yinlari boshlanishida u 53 yoshga to‘ladi.
Navbatdagi Olimpiada O‘zbekiston qahramoni uchun 9-musobaqa bo‘ladi.
Oksana Chusovitina faoliyatiga oid statistika va faktlar
- MDH terma jamoasi safida 1992-yilgi Olimpiada chempioni.
- 2008-yilgi Olimpiya o‘yinlari vitse-chempioni.
- Uch karra Jahon chempioni (1991-yilda jamoaviy bahslar (SSSR terma jamoasi) va erkin mashq, 2003-yilda tayanib sakrash).
- Jahon chempionatlarida to‘rt karra kumush (1991, 2001, 2005 va 2011-yillar) va 4 karra bronza medali (1992, 1993, 2002, 2006) sohibi.
- Tayanib sakrash bo‘yicha Yevropa chempioni (2008-yil), kumush medal (2002) va uch karra bronza egasi.
- Tayanib sakrash bo‘yicha Jahon Kubogi oltin medal sohibi (2022-yil)
- Sakkizta Olimpiadada qatnashgan yagona gimnastikachi. Sportchi ushbu natijasi evaziga Ginnesning rekordlar kitobiga kiritilgan.
Izoh (0)