Жо Байден маъмурияти ўзининг ядровий қурол стратегиясини кучайтирмоқда, дея Байден маъмуриятининг исми ошкор қилинмаган юқори мартабали ходимига таяниб, Semafor нашри хабар берди.
Унга кўра, Россия ва Хитой ўтган йили АҚШнинг қурол назоратини муҳокама қилиш бўйича саъй-ҳаракатларини қўллаб-қувватламаган.
Маълум бўлишича, янги гравитацион бомба яратиш, шунингдек, Огаё тоифасидаги қатор ядро сувости кемаларининг хизмат қилиш муддатини узайтириш ҳақида қарор қабул қилинган.
Жо Байден маъмурияти, шунингдек, ортиб бораётган ядровий таҳдидлар шароитида АҚШ ядровий кучларининг кейинги эволюциясини кўриб чиқмоқда ва асосий иттифоқчилар ўзларини ҳимоя қилиш учун зарур бўлган узоқ масофали зарба бериш ва кузатув қобилиятига эга бўлишини таъминлашга ҳаракат қилмоқда, — дея батафсил маълумот беришдан бош тортган расмий.
Нашрга кўра, Оқ уй Миллий хавфсизлик кенгаши вакили Пранай Вадди Вашингтоннинг тегишли режаларини қурол назорати бўйича конференцияда эълон қилиши кутилмоқда.
Ўтган йили худди шу конференцияда Жо Байденнинг миллий хавфсизлик бўйича маслаҳатчиси Жейк Салливан Қўшма Штатлар Хитой ва Россия билан қурол назорати масаласини олдиндан ҳеч қандай шартларсиз муҳокама қилишга тайёрлигини айтган. Бироқ, Пекин ва Москва бу таклифларни ҳақиқатда рад этган, бу эса АҚШни ўз ёндашувини ўзгартиришга мажбур қилган.
Байден маъмурияти ҳали ҳам ўзининг геосиёсий рақибларини музокаралар столига ўтқазишга умид қилмоқда, аммо уларни рад этиш оқибатлари бўлишини кўрсатмоқчи, дея қўшимча қилди манба. Россия ва Хитой агар улар ҳамкорликдан бош тортишда давом этишса, хавфсизлик муҳити ёмонлашади, — дея қўшимча қилган расмий.
Изоҳ (0)