Jo Bayden ma’muriyati o‘zining yadroviy qurol strategiyasini kuchaytirmoqda, deya Bayden ma’muriyatining ismi oshkor qilinmagan yuqori martabali xodimiga tayanib, Semafor nashri xabar berdi.
Unga ko‘ra, Rossiya va Xitoy o‘tgan yili AQSHning qurol nazoratini muhokama qilish bo‘yicha sa’y-harakatlarini qo‘llab-quvvatlamagan.
Ma’lum bo‘lishicha, yangi gravitatsion bomba yaratish, shuningdek, Ogayo toifasidagi qator yadro suvosti kemalarining xizmat qilish muddatini uzaytirish haqida qaror qabul qilingan.
Jo Bayden maʼmuriyati, shuningdek, ortib borayotgan yadroviy tahdidlar sharoitida AQSH yadroviy kuchlarining keyingi evolyutsiyasini ko‘rib chiqmoqda va asosiy ittifoqchilar o‘zlarini himoya qilish uchun zarur bo‘lgan uzoq masofali zarba berish va kuzatuv qobiliyatiga ega bo‘lishini taʼminlashga harakat qilmoqda, — deya batafsil ma’lumot berishdan bosh tortgan rasmiy.
Nashrga ko‘ra, Oq uy Milliy xavfsizlik kengashi vakili Pranay Vaddi Vashingtonning tegishli rejalarini qurol nazorati bo‘yicha konferensiyada e’lon qilishi kutilmoqda.
O‘tgan yili xuddi shu konferensiyada Jo Baydenning milliy xavfsizlik bo‘yicha maslahatchisi Jeyk Sallivan Qo‘shma Shtatlar Xitoy va Rossiya bilan qurol nazorati masalasini oldindan hech qanday shartlarsiz muhokama qilishga tayyorligini aytgan. Biroq, Pekin va Moskva bu takliflarni haqiqatda rad etgan, bu esa AQSHni o‘z yondashuvini o‘zgartirishga majbur qilgan.
Bayden ma’muriyati hali ham o‘zining geosiyosiy raqiblarini muzokaralar stoliga o‘tqazishga umid qilmoqda, ammo ularni rad etish oqibatlari bo‘lishini ko‘rsatmoqchi, deya qo‘shimcha qildi manba. Rossiya va Xitoy agar ular hamkorlikdan bosh tortishda davom etishsa, xavfsizlik muhiti yomonlashadi, — deya qo‘shimcha qilgan rasmiy.
Izoh (0)