Жанубий Корея фаолларидан иборат гуруҳ 6 июнь куни Шимолий Корея ҳудудига ҳаво шарлари учирган. Бу ҳақда Корея маҳаллий нашрларига таяниб, Reuters хабар берди.
Манбада айтилишича, ҳаво шарлари ичига ўн минглаб варақалар жойлаштирилган. Уларда Шимолий Корея раҳбари Ким Чен Ин қаттиқ танқид остига олинган.
Ҳаво шарлари учирган гуруҳга 2000 йилда Шимолий Кореядан қочган Пак Санг-Хак исмли фуқаро раҳбарлик қилган. У ташкил этган “Озод Шимолий Корея учун курашувчилар” гуруҳи икки мамлакат чегарасидаги Почеон шаҳридан 200 минг флаер, К-поп видеолари ва дорамалари юкланган 5000 та USB флеш-дисклар билан тўлдирилган 10 та шарни учирган.
Ҳаво шарлари ичида 2000 та 1 долларлик банкноталар бўлгани ҳам хабар қилинган. Фаоллар ушбу воситалардан пропаганда воситаси сифатида фойдаланиш мумкинлигини хабар қилган.
Ҳаво шарлари ичида, шунингдек, Шимолий Корея раҳбари ва унинг синглиси, оиласи суратлари ҳам жойлаштирилган. Суратлар остида танқидий мазмундаги сўзлар ёзиб қолдирилган.
“Халқ душмани Ким Чен Ин Корея Республикаси халқига ахлат ва чиқинди юборди, лекин биз қочқинлар сизга, Шимолий кореялик ватандошларимизга, фақат ҳақиқат ва муҳаббатни юборамиз”, — дейилган суратлар остидаги изоҳларда.
Жанубий Корея президенти Юн Сук Ёл 6 июнь кунидаги нутқида куч орқали тинчлик ўрнатиш ваъдасини яна бир бор тасдиқлаган. Бу Шимолни ўзгартиришга, унинг халқи эркинлиги ва инсон ҳуқуқларини тиклашга ҳамда пировардида бирлашишга эришишга ёрдам бериши айтилган.
Сеул расмийлари, шунингдек, фаолларни Шимолий Кореяга қарши ҳар қандай мазмун ва кўринишдаги тарғиботдан тийилишга чақирган. Ҳукуматдан мустақил ҳаракат қилмасликни сўраган.
Аввалроқ Шимолий Корея жануб томонга 3500 дан ортиқ ҳаво шарлар учирган эди. Шарлар чиқинди билан тўлдирилиб, чегара атрофидаги ҳудудларга юборилган. Пхеньян бундан мақсад Жануб пропагандасига жавоб қайтариш эканини билдирган.
Шимолнинг ҳаракатларига жавобан Сеул 2018 йилда имзоланган ҳарбий пактдан чиқишини эълон қилган. Чегара ҳудуддаги тарғибот овоз кучайтиргичларини қайта ишга туширганини ҳамда демилитаризация зонаси атрофига ҳарбийлар жойлаштирилишини маълум қилган.
Изоҳ (0)