Исроил армияси 6 июнь куни Ғазо секторидаги Нусейрат қочқинлар лагерига берган зарбаси оқибатида камида 32 киши ҳалок бўлди. Бу ҳақда Al Jazeera хабар берди.
Исроил қирувчи самолётлари билан фаластинликлар бошпана сифатида фойдаланган БМТнинг фаластинликларга ёрдам кўрсатиш агентлиги (UNRWA) мактабини нишонга олганини тасдиқлади. Яҳудий давлати ҲАМАС жангчилари мазкур мактабдан бошпана сифатида фойдаланганини даъво қилди.
Ғазо ҳукумати Исроил ҳужумини “геноцид ва этник тозалаш”нинг “аниқ далили” деб таърифлади. Октябрь ойидан бери Ғазодаги UNRWA объектларида бошпана сифатида фойдаланаётган 455 нафар одам ҳалок бўлган.
Исроилнинг Рафаҳдаги қочқинлар лагерига ҳужуми
27 май куни Исроил кучлари Рафаҳдаги қочқинлар яшайдиган Тал-ас-Султон лагерини бомбардимон қилди, 40 га яқин одам ҳалок бўлди. Қурбонларнинг аксарияти аёллар ва болалар бўлган. Фаластин Қизил ярим ой жамияти чодирлардаги кўплаб одамлар тириклаб ёниб кетганини таъкидлаган.
Маҳаллий манбалар камида саккизта ракета БМТнинг фаластинлик қочқинларга ёрдам кўрсатувчи агентлиги (UNRWA) омбори ёнидаги чодир лагерига урилганини айтган. Исроил армияси ўз баёнотида ҲАМАС лагерига ҳаво ҳужуми уюштирилганини даъво қилган. Исроил бош вазири Биньямин Нетаньяху эса ҳужумни “фожиали хато” дея таърифлаган.
Изоҳ (0)