Канаданинг Нью Брунсвик провинциясида 200 дан ортиқ одамда сирли мия касаллиги аниқланди. Канадалик олим, микробиолог Майкл Култҳартга мазкур касалликни ўрганиш тақиқланди. Бу ҳақда The Guardian хабар берди.
Маълум қилинишича, 2021 йилда 40 дан ортиқ бемор мия касаллигига чалинганида, уларнинг аксариятида ортиқча сўлак ажралиши кузатилган. Бошқа беморлар эса ўзини танасида ҳашаротлар ҳаракатланаётгандай ҳис қилган. Бироқ орадан бир йил ўтиб, мустақил комиссия бу одамларга неврологик касаллик ташхиси нотўғри қўйилгани, уларда деменция ва саратон касаллиги ривожлангани ҳақида хулоса чиқарган.
Аммо канадалик олим Култҳартга кўра, одамларда нейродегенератив синдромлар атроф-муҳит таъсирида қўзғайди ёки тезлашади.
Менинг илмий фикрим шуки, Нью Брунсвикда нимадир содир бўлмоқда, буни индивидуал неврологнинг тарафкашлиги билан тушунтириб бўлмайди. Аллақачон 200 га яқин ҳолатлар қайд этилган, — дейди у.
Олим ҳамкасбига ёзган мактубларидан бирида аниқланган ғайриоддий симптомларни маълум диагностик патологиялар билан ифодалаш қийинлигини айтган. Унинг фикрича, сиёсатчилар касалликни ўрганишига тўсқинлик қилиш учун сабаб ва имконият топган.
Вақт ўтиши билан ҳақиқат ойдинлашишига ишонаман, аммо ҳозирча қўлимиздан келганича шубҳали ҳолатлар ҳақида маълумот тўплашда давом этишимиз мумкин, — деб ёзади Култҳарт.
Сирли мия касаллигига чалинган беморлардан бири у ҳеч қандай тиббий ёрдам олмагани, чунки сирли касаллик расман тан олинмаганини айтмоқда.
Изоҳ (0)