16 февраль куни исроиллик гуруҳлар ноқонуний оккупация қилинган Ғарбий Соҳил жанубидаги фаластинликлар мулкларига ўт қўйди. Бу ҳақда Anadolu нашри хабар берди.
Хабарда айтилишича, гуруҳлар маҳаллий хонадонлар, транспорт воситалари ва чорва етиштириш объектларида ёнғин келтириб чиқарган. Бир қанча кўчалар тутун ичида қолган. Қурбонлар ҳақида маълумот берилмаган.
Манбага кўра, айни дамда Ғарбий Соҳил ва Қуддус шарқидаги 300 га яқин ноқонуний аҳоли пунктларида 700 мингга яқин исроиллик истиқомат қилади. Исроил ҲАМАСга қарши бошлаган амалиётдан сўнг эса ҳудудга бамайлихотир кўчиб келаётганлар сони бир неча каррага ошган.
Исроил томонидан Ғарбий Соҳилда қурилган барча яҳудий аҳоли пунктлари халқаро ҳуқуққа мувофиқ ноқонуний ҳисобланади. Халқаро ҳамжамият бу борада Исроил ҳукуматига бир неча бор нота ҳам жўнатган. Расмий Тель-Авив эса мурожаатларни эътиборсиз қолдириб келиши айтилади.
Хабарда айтилишича, Исроил армияси томонидан босиб олинган ушбу ҳудудда камида 394 фаластинлик ҳалок бўлган, 4400 нафари яраланган.
Изоҳ (0)