Португалиянинг Бежа шаҳрида Португалия ҳарбий-ҳаво кучларининг 72 йиллигига бағишланган шоу вақтида иккита Як-52 самолёти тўқнашиб кетди. Бу ҳақда Informator хабар берди.
Самолётлардан бирининг учувчиси воқеа жойида вафот этган. Манёвр пайтида самолётлардан бири иккинчисининг қанотига тегиб, бошқарувни йўқотгач, қулаган.
Як Cтарс ҳаво акробатика жамоасининг иккита самолёти 2 июнь куни Бежа авиасалонида парвоз чоғида тўқнашиб кетди. Бир киши ҳалок бўлди, — дейилади хабарда.
Самолёт қулаши натижасида кучли портлаш содир бўлгани қайд этилган. Тўқнашув натижасида мувозанатни йўқота бошлаган иккинчи самолёт учувчиси фавқулодда қўнишга муваффақ бўлган ҳамда жароҳат олган.
Қайд этилишича, авария ва учувчининг ўлими туфайли Португалия ҳарбий-ҳаво кучларининг 72 йиллигига бағишланган тадбир бекор қилинган. Ҳаво намойишида Испания—Португалия фуқаролик ва ҳарбий авиация гуруҳи иштирок этган.
Изоҳ (0)