Яқин Шарқ воситачилари Исроил ва ҲАМАС томонларини АҚШ президенти Жо Байден таклиф қилган сулҳ битимини қабул қилишга чақирди. Бу ҳақда тегишли манбаларга таяниб, Deutsche Welle хабар берди.
Баёнот муаллифлари ҲАМАСни ҳам, Исроилни ҳам Байден томонидан илгари сурилган тамойилларни ўзида мужассам этган келишувни якунлашга чақиришларини айтган.
Аввалроқ Америка раҳбари Ғазода ўт очишни тўхтатиш ва 2023 йил 7 октябрда ҲАМАСнинг Исроилга ҳужуми чоғида ўғирлаб кетилган асирларни озод қилиш бўйича уч босқичли режани тақдим этган эди.
Олти ҳафта давом этиши керак бўлган биринчи босқич Ғазо секторида тўлиқ ўт очишни тўхтатиш ва Исроил қўшинларини минтақадаги аҳоли пунктларидан олиб чиқиб кетишни таклиф қилади. Шу билан бирга, ҲАМАС жангарилари юзлаб фаластинлик маҳбусларни озод қилиш эвазига бир қанча гаровга олинганларни Исроилга қайтариши керак. Иккинчи босқичда Исроил қўшинлари Ғазо секторидан тўлиқ чиқиб кетиши, ҲАМАС эса қолган гаровдагиларни қайтариши керак. Гуруҳ, шунингдек, ўлдирилганларнинг қолдиқларини оилаларига қайтариши керак. Битимнинг учинчи босқичи АҚШ ва халқаро ҳамжамият кўмагида Ғазони реконструкция қилишни бошлашни назарда тутади.
Исроил ҳам, ҲАМАС ҳам Байденнинг режасини қўллаб-қувватламоқчи эмас, — дейилади хабарда.
Исроил Бош вазири Биньямин Нетаньяху яна бир бор уруш ҲАМАС гуруҳи тўлиқ йўқ қилинганидан, барча гаровга олинганлар озод этилганидан ва Ғазо Исроилга энди хавф туғдирмаслиги таъминлангандан кейингина якунланишини таъкидлаган.
Изоҳ (0)