Жанубий Корея ҳукумати Шимолий Корея билан чегарада назоратни кучайтириш учун демаркация зонасида сунъий интеллект тизимларини ўрнатади. Бу ҳақда Yonhap агентлиги хабар берди.
Сунъий интеллект тизими Жанубий Корея аскарларига Шимолий Корея чегарасидаги фаолликни таҳлил қилишда ёрдам бериши хабар қилинган. Ушбу тизим келгусида босқичма-босқич янгилаб борилади.
Манбада айтилишича, Сеул Корея яриморолини иккига бўлувчи шимолий Кёнгги провинциясининг Еончхон округи чегараси бўйлаб сунъий интеллект тизимларини синовдан ўтказмоқда. Ушбу тизимларни ўрнатишдан асосий мақсад Шимолий Кореянинг кучайиб бораётган таҳдидларига қарши туриш эканлиги айтилган.
“Жанубий Корея армиясининг Ҳансан батальони реал вақт режимида видеотасвирларни таҳлил қилиш ҳамда одамлар ва ёввойи табиатни, масалан, буғу ва чўчқаларни таниб олиш учун ўрнатилган термал кузатув қурилмаларида сунъий интеллект технологиясидан фойдаланмоқда”, — дейилган Жанубий Корея ҳарбийлари эълон қилган ҳисоботда.
Тизим аскарларга Шимолий Корея чегарасидаги фаолликни таҳлил қилишда ёрдам бериши маълум қилинган. Хатар аниқланган тақдирда, бу тизимлар автоном равишда марказий тармоққа хабар жўнатади.
Бундан ташқари, Жанубий Корея ҳарбийлари қўшинларнинг пиёда етиб келиши учун вақт талаб қиладиган тепаликларни кузатиш учун темирйўл тўсиғи бўйлаб тезлик билан ҳаракатланадиган робот-камералардан фойдаланмоқда.
Изоҳ (0)