Америкалик миллиардер ва медиамагнат Руперт Мердок россиялик миллиардер Роман Абрамовичнинг собиқ қайнонаси Елена Жуковага уйланди. Бу ҳақда медиамагнатга тегишли The Sun нашри хабар берди.
Маросим Калифорниядаги Мердокка тегишли узумзорда бўлиб ўтган. Тўйда жуфтликларнинг яқинлари иштирок этган. Март ойида Мердок 93 ёшни қаршилаганди, бу унинг бешинчи никоҳи. 2022 йил июнь ойида у олти йил биргаликда яшаган 66 ёшли модел Жерри Холл билан ажрашганди.
2023 йилнинг март ойида Мердок бизнесмен ва мусиқачи Честер Смитнинг 66 ёшли беваси Энн-Лесли Смит билан оила қуриши ҳақида хабар тарқалди. Бироқ оммавий ахборот воситалари 2023 йилнинг ёзидан бошлаб Мердок россиялик миллиардер Роман Абрамовичнинг собиқ қайнонаси, 67 ёшли микробиолог Елена Жукова билан муносабатларга киришганини эълон қилди.
Олти фарзанд отаси Мердок 1979 йилда The New York Post, The Wall Street Journal, Times ва The Sun газеталарини ўз ичига олган Nеws Cоrporation холдингига асос солган. Миллиардер, шунингдек, Fox News телеканали ва 20тҳ Century Fox, қатор сунъий йўлдош операторлари ва Dоw Jones агентлигига эгалик қилади.
Ноябрь ойида Руперт Мердок Fox корпорацияси раиси ва News Corp ижрочи раиси лавозимларини тарк этиб, бошқарувни ўғли Лахланга топширганди. Forbes нашрининг дунёнинг энг бой миллиардерлари рейтингида Мердок 19,9 миллиард доллар бойлиги билан 94-ўринни эгаллаб турибди.
Изоҳ (0)