Кувайт амири Мишъал ал-Аҳмад ал-Жобир ас-Сабоҳ шайх Сабоҳ Холид ас-Сабоҳни валиаҳд шаҳзода этиб тайинлаш ҳақидаги фармонни имзолади. Бу ҳақда КУНА давлат ахборот агентлиги маълум қилди.
Сабоҳ Холид ал-Сабоҳ 1953 йилда туғилган. У Кувайт университетида сиёсатшунослик бўйича бакалавр даражасини олган. 2019 йилдан 2022 йилгача бош вазир лавозимида ишлаган. Турли йилларда ташқи ишлар вазири, Кувайтнинг БМТдаги доимий вакили, Саудия Арабистонида элчи бўлган.
Олдинги барча амирлар ва валиаҳдлар ал-Жобир ёки ал-Салим сулоласига мансуб эди. Шайх Сабоҳ эса отаси ҳеч қачон амир бўлмаган биринчи валиаҳд шаҳзода бўлди.
Кувайт конституциясига кўра, валиаҳд шаҳзода номзоди Миллий ассамблея томонидан тасдиқланиши керак. Бироқ 10 май куни Кувайт амири Миллий мажлис (бир палатали парламент) тарқатиб юборилгани ва конституциядаги айрим қоидалар тўхтатилганини эълон қилди.
Унинг сўзларига кўра, мамлакат сиёсий саҳнасидаги келишмовчиликлар туфайли расмийлар конституциянинг айрим моддалари фаолиятини тўрт йилдан кўп бўлмаган муддатга тўхтатиб қўйишга мажбур бўлмоқда, бу даврда “демократик жараённинг барча жиҳатлари ўрганилади”. Шундан сўнг парламент ваколатлари вақтинча амир ва вазирлар маҳкамасига ўтди.
Мишъал ал-Аҳмад ал-Жобир ас-Сабоҳ ўтган йилнинг 20 декабрида миллий ассамблея олдида қасамёд қабул қилиб, расман Кувайт амири бўлди. Аввалги амир Наваф ал-Аҳмад ал-Жобир ас-Сабоҳ 2020 йил сентябридан 2023 йилнинг 16 декабрь вафотига қадар амир лавозимида ишлаганди.
Изоҳ (0)