Yevropa Ittifoqi (YI) qarovsiz jonivorlarning farovonligi va nazoratini umumiy standart ostida muvofiqlashtirishga harakat qilmoqda, deya Anadolu nashri xabar berdi.
Yevrokomissiya tomonidan 2023-yilda taqdim etilgan qonunchilik taklifi majburiy sterilizatsiya, mikrochiplash, ro‘yxatga olish va parvarish qiluvchilarning malakasini oshirish kabi choralarni o‘z ichiga oladi. Yevropa davlatlarida qarovsiz hayvonlar kamdan kam uchrasa-da, YI bu muammoga umumiy yechim topish bo‘yicha choralar ko‘rishda davom etmoqda.
Yevrokomissiya ma’lumotlariga ko‘ra, har yili ko‘plab mushuklar va itlar Yevroittifoq bo‘ylab jamoat yoki notijorat tashkilotlariga qarashli boshpanalarda asrab olinadi. Belgiyada har yili 7 ming it va 26 ming mushuk boshpanalarga tashlab ketilgan bo‘lsa, Ispaniyada bu ko‘rsatkich 100 mingga yaqin it va 30 ming mushukni tashkil etadi.
2023-yilda Yevropa parlamenti tomonidan o‘tkazilgan Eurobarometer ijtimoiy so‘roviga ko‘ra, Yevropa Ittifoqi fuqarolarining 74 foizi uy hayvonlari farovonligi yaxshiroq himoyaga muhtoj, deb hisoblaydi.
Yevropa komissiyasining sog‘liqni saqlash va oziq-ovqat xavfsizligi departamenti matbuot kotibi Anna Greyning taʼkidlashicha, Yevropa komissiyasi 2023-yil 7-dekabrda o‘z faoliyati natijalariga ko‘ra qonunchilik taklifini taqdim etgan. Qonun loyihasining maqsadi uy hayvonlarini pitomniklarda, hayvonlar uchun do‘konlarda va boshpanalarda ko‘paytirish, saqlash va parvarish qilish uchun Yevropa Ittifoqi standartlarini yaratishdir. Bundan tashqari, hujjatda it va mushuklarning noqonuniy onlayn savdosiga qarshi kurashni kuchaytirish, shuningdek, ushbu hayvonlarni majburiy identifikatsiya qilish va milliy maʼlumotlar bazalarida ro‘yxatdan o‘tkazishni joriy etish orqali monitoring olib borish nazarda tutilgan.
Hujjatda qayd etilishicha, hayvonlarga g‘amxo‘rlik qiluvchilar it va mushuklarning biologik, fiziologik va xulq-atvor ehtiyojlarini tushunishi hamda ularning odatlarini, shu jumladan, kasallik belgilarini ham tan olishi kerak. Bundan tashqari, tarbiyachilar uchun muntazam treninglar o‘tkazish rejalashtirilgan.
Izoh (0)