Нидерландиядаги Счипҳол аэропортида ишлаб турган самолёт двигатели ичига тушиб кетган йўловчи фожиали тарзда ҳалок бўлди. Бу ҳақда CNN нашри хабар берган.
Ҳодиса 29 май куни юз берган. Амстердам шаҳридаги Счипҳол аэропортида йўловчи эътиборсизлик оқибатида самолёт реактив двигатели устига қулаб тушган.
Нидерландия қироллик ҳарбий полицияси ҳалокат содир бўлганини тасдиқлаган. Полициянинг қўшимча қилишича, воқеа сабаблари ва тафсилотлари ўрганилмоқда.
Бахтсиз ҳодиса содир бўлган пайтда самолёт Амстердамдан Дания марказидаги Биллунд шаҳрига учиб кетиш арафасида бўлган. Самолёт борти йўловчилар билан тўла бўлган.
Ҳодиса юз берганидан сўнг самолёт ўчирилиб, барча йўловчилар ундан туширилган. Жасадни двигателдан чиқариб олишга ҳаракат қилинган.
“Биз ҳозирда Счипҳолдаги ҳодисага гувоҳ бўлган йўловчилар ва ходимларга ёрдам кўрсатмоқдамиз. Улар аянчли воқеага дуч келишган”, — дейилган аэропорт расмийлари эълон қилган баёнотда.
Маълумот ўрнида, 2022 йилнинг декабрь ойида АҚШнинг Алабама штатидаги Монтгомери минтақавий аэропортида ҳам самолёт двигателига тушиб кетган ишчи ҳалок бўлган эди. 2015 йил декабрь ойида эса Ҳиндистоннинг Мумбай аэропортида муҳандис Air India самолёти двигателига қулаб тушиб воқеа жойида вафот этган.
Изоҳ (0)