Singapore Airlines авиакомпаниясининг кучли ҳаво гирдобига дуч келган рейси бортида бир киши ҳалок бўлди, 70 дан ортиқ киши жароҳат олди. Бу ҳақда тегишли манбаларга таяниб, Deutsche Welle хабар берди.
Boeing 777-300ER йўловчи самолёти Лондондан Сингапурга SQ 321 рейсини амалга ошираётганда турбулентликка дуч келган. Самолёт экипажи парвозни Бангкокка йўналтиришга қарор қилган ҳамда у ерда фавқулодда қўнишни амалга оширган. Самолёт бортида 211 йўловчи ва 18 экипаж аъзоси бўлган.
Мьянма устида 10 соатлик парвоздан сўнг тўсатдан кучли турбулентлик бошланган. Ҳодиса оқибатида 73 ёшли Британия фуқароси вафот этган. Дастлабки маълумотларга кўра, у турбулентлик пайтида юрак хуружига учраган.
Singapore Airlines номидан марҳумнинг оила аъзолари ва яқинларига чуқур ҳамдардлик билдираман, — деди авиакомпания бош директори Го Чоон Фонг видеомурожаатида.
Ҳодисани Сингапурнинг Транспорт хавфсизлигини текшириш бюроси (ТSIB) ва АҚШ Миллий транспорт хавфсизлиги кенгаши текширмоқда.
Изоҳ (0)