Niderlandiyadagi Schiphol aeroportida ishlab turgan samolyot dvigateli ichiga tushib ketgan yo‘lovchi fojiali tarzda halok bo‘ldi. Bu haqda CNN nashri xabar bergan.
Hodisa 29-may kuni yuz bergan. Amsterdam shahridagi Schiphol aeroportida yo‘lovchi eʼtiborsizlik oqibatida samolyot reaktiv dvigateli ustiga qulab tushgan.
Niderlandiya qirollik harbiy politsiyasi halokat sodir bo‘lganini tasdiqlagan. Politsiyaning qo‘shimcha qilishicha, voqea sabablari va tafsilotlari o‘rganilmoqda.
Baxtsiz hodisa sodir bo‘lgan paytda samolyot Amsterdamdan Daniya markazidagi Billund shahriga uchib ketish arafasida bo‘lgan. Samolyot borti yo‘lovchilar bilan to‘la bo‘lgan.
Hodisa yuz berganidan so‘ng samolyot o‘chirilib, barcha yo‘lovchilar undan tushirilgan. Jasadni dvigateldan chiqarib olishga harakat qilingan.
“Biz hozirda Schipholdagi hodisaga guvoh bo‘lgan yo‘lovchilar va xodimlarga yordam ko‘rsatmoqdamiz. Ular ayanchli voqeaga duch kelishgan”, — deyilgan aeroport rasmiylari eʼlon qilgan bayonotda.
Maʼlumot o‘rnida, 2022-yilning dekabr oyida AQSHning Alabama shtatidagi Montgomeri mintaqaviy aeroportida ham samolyot dvigateliga tushib ketgan ishchi halok bo‘lgan edi. 2015-yil dekabr oyida esa Hindistonning Mumbay aeroportida muhandis Air India samolyoti dvigateliga qulab tushib voqea joyida vafot etgan.
Izoh (0)