ЕИнинг Брюсселдаги элчилари норасмий равишда марҳум мухолифатчи Алексей Навальний номи билан аталган Россияга қарши навбатдаги санкцияларни жорий этиш тўғрисида келишиб олдилар.
Хабарга кўра, янги санкциялар Россияда инсон ҳуқуқлари бузилишига алоқадор шахсларга қарши қаратилган бўлади. Мазкур санкциялар режимига норасмий равишда колонияда вафот этган россиялик мухолифатчи сиёсатчи Алексей Навальний номи берилган.
Санкциялар, хусусан, Федерал Жазони ижро этиш хизмати ҳамда Навальний ва Мемориал ҳамраиси Олег Орлов, петербурглик рассом Саша Скочиленколарнинг ишларида иштирок этган терговчилар, прокурорлар ва судьяларга нисбатан қўлланилади. Рўйхатга Навальний, Орлов ва Скочиленконинг турли фаолияти бўйича ҳукм чиқарган ўн нафар судья ҳам киритилган.
Бундан ташқари, унинг таркибига ФЖIX инспекцияси бошлиғи Александр Ермоленко (Ив Роше иши бўйича Навальний учун шартли жазони ҳақиқий жазо билан алмаштиришни қўллаб-қувватлаган), РФ Тергов қўмитаси терговчиси Илья Савченко (Олег Орлов ишини тергов қилган), прокурор Сергей Воробёв (Орлов иши бўйича давлат прокурори) киритилган.
Аввалроқ Европа Иттифоқи Алексей Навальнийнинг ўлими муносабати билан илк санкцияларни жорий қилган эди. Икки ташкилотга: 3 ва 6- сонли ахлоқ тузатиш колонияларига, шунингдек, ўттиздан ортиқ шахсларга, шу жумладан суд ҳокимияти вакиллари ва колониялар раҳбариятига санкция қўлланилган.
Навальнийнинг ўлими
Навальний Ямало-Ненецк автоном округидаги 3-сонли ахлоқ тузатиш колониясида 16 февраль куни вафот этган эди. Ўлим ҳисоботида сиёсатчи табиий сабабларга кўра вафот этгани айтилган. Мухолифатчи тарафдорлари унинг ўлдирилганига ишонади. Навальний 2021 йил бошидан бери қамоқда бўлган. 2023 йил августида Москва шаҳар суди сиёсатчини “экстремизм” иши бўйича махсус режимли колонияда 19 йиллик қамоқ жазосига ҳукм қилган эди.
Навальний вафотидан сўнг, 40 дан ортиқ давлатлар фожиа ҳолатларини мустақил текширишга чақирган. Европа Иттифоқининг Женевадаги халқаро ташкилотлар бўйича вакили унинг тўсатдан содир бўлган ўлими юзасидан мустақил ва шаффоф халқаро тергов ўтказиш имкониятини таъминлаши кераклигини таъкидлаган.
Изоҳ (0)