YIning Bryusseldagi elchilari norasmiy ravishda marhum muxolifatchi Aleksey Navalniy nomi bilan atalgan Rossiyaga qarshi navbatdagi sanksiyalarni joriy etish to‘g‘risida kelishib oldilar.
Xabarga ko‘ra, yangi sanksiyalar Rossiyada inson huquqlari buzilishiga aloqador shaxslarga qarshi qaratilgan bo‘ladi. Mazkur sanksiyalar rejimiga norasmiy ravishda koloniyada vafot etgan rossiyalik muxolifatchi siyosatchi Aleksey Navalniy nomi berilgan.
Sanksiyalar, xususan, Federal Jazoni ijro etish xizmati hamda Navalniy va Memorial hamraisi Oleg Orlov, peterburglik rassom Sasha Skochilenkolarning ishlarida ishtirok etgan tergovchilar, prokurorlar va sudyalarga nisbatan qo‘llaniladi. Ro‘yxatga Navalniy, Orlov va Skochilenkoning turli faoliyati bo‘yicha hukm chiqargan o‘n nafar sudya ham kiritilgan.
Bundan tashqari, uning tarkibiga FJIX inspeksiyasi boshlig‘i Aleksandr Yermolenko (Iv Roshe ishi bo‘yicha Navalniy uchun shartli jazoni haqiqiy jazo bilan almashtirishni qo‘llab-quvvatlagan), RF Tergov qo‘mitasi tergovchisi Ilya Savchenko (Oleg Orlov ishini tergov qilgan), prokuror Sergey Vorobyov (Orlov ishi bo‘yicha davlat prokurori) kiritilgan.
Avvalroq Yevropa Ittifoqi Aleksey Navalniyning o‘limi munosabati bilan ilk sanksiyalarni joriy qilgan edi. Ikki tashkilotga: 3 va 6- sonli axloq tuzatish koloniyalariga, shuningdek, o‘ttizdan ortiq shaxslarga, shu jumladan sud hokimiyati vakillari va koloniyalar rahbariyatiga sanksiya qo‘llanilgan.
Navalniyning o‘limi
Navalniy Yamalo-Nenetsk avtonom okrugidagi 3-sonli axloq tuzatish koloniyasida 16-fevral kuni vafot etgan edi. O‘lim hisobotida siyosatchi tabiiy sabablarga ko‘ra vafot etgani aytilgan. Muxolifatchi tarafdorlari uning o‘ldirilganiga ishonadi. Navalniy 2021-yil boshidan beri qamoqda bo‘lgan. 2023-yil avgustida Moskva shahar sudi siyosatchini “ekstremizm” ishi bo‘yicha maxsus rejimli koloniyada 19 yillik qamoq jazosiga hukm qilgan edi.
Navalniy vafotidan so‘ng, 40 dan ortiq davlatlar fojia holatlarini mustaqil tekshirishga chaqirgan. Yevropa Ittifoqining Jenevadagi xalqaro tashkilotlar bo‘yicha vakili uning to‘satdan sodir bo‘lgan o‘limi yuzasidan mustaqil va shaffof xalqaro tergov o‘tkazish imkoniyatini ta’minlashi kerakligini ta’kidlagan.
Izoh (0)