Актриса Фотима Воҳидова “Дарё”нинг YouTube’даги каналига берган интервьюсида нима сабабдан турк йигити билан оила қургани ва “Анора” фильмидаги қаҳрамонининг қисмати унинг ҳаётига кўчгани ҳақида сўзлаб берди.
— Турк йигитга турмушга чиққан бир дугонам бўларди. “Сени ҳам Туркияга олиб кетаман”, деб ҳазиллашиб юрарди. Шу орада укам Туркияга бориб ишламоқчи бўлди ва шу дугонам орқали бир автомобиль ювиш шохобчасига ишга кирди. Укам қандай жойда, кимлар қўлида ишлаяпти, деган ўй-хаёлда кўнглимни хотиржам қилиш мақсадида Туркияга бордим. Дугонам мени кутиб олиб, у ернинг эгаси билан таништирди. Буни қарангки, ўшанда бу йигит кейинчалик турмуш ўртоғим бўлишини хаёлимга ҳам келтирмагандим. Дўстлашиб қолдик, гаплашиш турардик. Шу билан у менга турмуш қуриш таклифини берди. Аввалига хорижга турмушга чиқолмасам керак, деб йўқ дедим. Кейин ўйлаб қарасам, ёшим ҳам ўтяпти, у ҳам жуда яхши инсон. Унинг тили бошқа, менинг тилим бошқа бўлса-да, дунёқарашимиз, фикрларимиз бир-биримизга мос келди. Қайнонам билан таништирди, у кишини ҳам яхши кўриб қолдим. Худога шукр, мана, ҳозир тўрт ярим ёшли қизимиз бор, — дейди Фотима Воҳидова.
Актриса турк оилаларидаги қайнона-келин муносабатлари ҳақида қуйидагиларни сўзлаб берди.
— Туркларда ота-онага муносабат ўзбекларникидек эмас. Рости, бизнинг маданиятимиз, тарбиямизни кўриб, уларнинг ҳаваси келади. Масалан, у ерда қайнона-келинлик муносабатлари деярли йўқ, хоҳласа, муносабат қилишади, қилишмаса ҳам, бу оддий ҳолат. Бу масалада уларда кўпроқ келинлар қарор чиқаришади. Мен хоҳласам ҳам, турк келин бўлолмайман. Билсангиз, турклар қозоқ, ўзбек, туркман қизлар билан турмуш қуришга ҳаракат қилишади. Сабаби бизда катталарга ҳурмат бошқача, гўзал қадриятларимиз бор. Қайнонамнинг уч ўғли бор, қизи йўқ. Мен худди онамга қиладигандек муносабатда бўлганим учун мени ўз қизидек қабул қилган. Иккита турк овсиним бор, улар қайнота-қайнонам билан бизчалик яқин эмас, байрамларда ҳам қўнғироқ қилишмайди. Шундай вазиятлар бўладики, ўзбек қизи эканлигимдан хурсанд бўлиб кетаман, — дейди актриса.
Фотима Воҳидова илк марта “Анора” фильмидаги қаҳрамонининг қисмати ҳаётига кўчгани ва онасидан жуда эрта айрилгани ҳақида гапирди.
— “Анора”даги қисматим тўғри келиб қолди менга. Онам вафот этганларида шу ролни ўйнамасам бўларкан, деб қолгандим. Устозим Рихси Иброҳимовага қўнғироқ қилиб, онамнинг вафотлари ҳақида айтганимда “Анорага ўхшаб қолибсан-ку”, деб йиғлади. Лекин Анорадек қийналмадим. Отам ва ҳозирги онам ёнимизда, лекин ўша ҳиссиётни яшадим. Ўтган йили укам ҳам жигар серрозидан вафот этди, жанозасига келолмадим. Унга ҳам опа, ҳам она эдим. Хабарингиз бор, Туркияда қишда ер қимирлашлари кўп бўлди, қизим ҳам кичкина эди, мендан бошқа одамга кўнмайди. Йўл эса узоқ, шундоқ кетиб юборолмасдим. Яна бир укам билан бирга яшаймиз Туркияда, у ҳам боролмади. Лекин у ерда туриб бўлса ҳам, ҳамма маросимларини ўтказдим. Тақдир экан, кўнмасдан иложимиз қанча. Онамдан ёдгор укам Ойбек, Тошкентдаги укамиз Беҳрузбек бор, бахтимизга улар соғ бўлишсин. Ҳозир ҳамма нарсам бор, лекин онам ва укам йўқ. Яқинларнинг борида қадрига етиш керак экан, йўқотганда кеч бўлганини тушуниб етаркансиз. Қайнона-қайнотам ҳам жуда яхши инсонлар, бир онамни йўқотган бўлсам, иккинчисини топдим, дейман. Тошкентдаги онам ҳам самимий, меҳрибон инсон, лекин барибир қалбингиз кемтик бўлиб қолавераркан, — дейди Фотима Воҳидова.
Суҳбатни тўлиқ ҳолда томоша қилинг.
Изоҳ (0)