“Фарзандларимдан бирортаси Америка президенти бўлади”. Отабек Маҳкамов бола тарбиясидаги аҳамиятли жиҳатлар ва Нью-Йоркдан уй сотиб олгани ҳақида гапирди

Таниқли актёр, ҳуқуқшунос Отабек Маҳкамов “Нима гап?” YouTube каналига берган интервьюсида бир неча йил ишлаб, пул йиғиб Америкадан ўзига уй сотиб олгани ҳамда фарзандларини қандай тарбиялаши ҳақида сўзлаб берди.

— Етти ярим йил мобайнида пул йиғиб Нью-Йоркдан ўз уйимни сотиб олдим. Раҳматли онамнинг яхши гаплари бор эди. “Бўладиган гапни гапириш керак, бўладиган ишни қилиш керак”. Ҳа, менинг шундай орзум бор: Келгусида фарзандларимнинг биронтаси албатта АҚШ президенти бўлади. Амбициясиз инсон ўлик инсон, — дейди актёр.



Актёр шунингдек, фарзандлари тарбиясида нималарга аҳамият бериши ҳақида ҳам тўхталиб ўтди.

— Биринчиси — бу тўғри, ҳалол тарбия. Кўпчиликнинг фарзандини Америкада жамият тарбиялайди. Мен фарзандларимнинг яқин сирдоши бўлишни хоҳлайман. Чунки фарзандларингиз сизга сирини айта олмаса, у кўчадан сирдош излайди.  

Иккинчиси, уларни шундай катта қилишингиз керакки, улар сизнинг қандай қийналиб пул топаётганингизни ва бирон нарса харид қилаётганингизда қанчалик қийналаётганингизни кўриши керак. Керак бўлса бу жараёнда иштирок этиши керак.

Учинчиси, мен фарзандларимнинг ўқишидан умуман пул аямайман. Уларнинг суннат тўйи, ақиқа ёки мучал тўйидан пул тежайман. Тежаган пулларимни фарзандларим номига банкдан ҳисоб очиб, ўша ерга қўйиб қўяман. Ўша пуллар йиғилиб-йиғилиб, ҳозир фарзандларимнинг пули меникидан ҳам кўпроқ, — дейди актёр.