Aktrisa Fotima Vohidova “Daryo”ning YouTube’dagi kanaliga bergan intervyusida nima sababdan turk yigiti bilan oila qurgani va “Anora” filmidagi qahramonining qismati uning hayotiga ko‘chgani haqida so‘zlab berdi.
— Turk yigitga turmushga chiqqan bir dugonam bo‘lardi. “Seni ham Turkiyaga olib ketaman”, deb hazillashib yurardi. Shu orada ukam Turkiyaga borib ishlamoqchi bo‘ldi va shu dugonam orqali bir avtomobil yuvish shoxobchasiga ishga kirdi. Ukam qanday joyda, kimlar qo‘lida ishlayapti, degan o‘y-xayolda ko‘nglimni xotirjam qilish maqsadida Turkiyaga bordim. Dugonam meni kutib olib, u yerning egasi bilan tanishtirdi. Buni qarangki, o‘shanda bu yigit keyinchalik turmush o‘rtog‘im bo‘lishini xayolimga ham keltirmagandim. Do‘stlashib qoldik, gaplashish turardik. Shu bilan u menga turmush qurish taklifini berdi. Avvaliga xorijga turmushga chiqolmasam kerak, deb yo‘q dedim. Keyin o‘ylab qarasam, yoshim ham o‘tyapti, u ham juda yaxshi inson. Uning tili boshqa, mening tilim boshqa bo‘lsa-da, dunyoqarashimiz, fikrlarimiz bir-birimizga mos keldi. Qaynonam bilan tanishtirdi, u kishini ham yaxshi ko‘rib qoldim. Xudoga shukr, mana, hozir to‘rt yarim yoshli qizimiz bor, — deydi Fotima Vohidova.
Aktrisa turk oilalaridagi qaynona-kelin munosabatlari haqida quyidagilarni so‘zlab berdi.
— Turklarda ota-onaga munosabat o‘zbeklarnikidek emas. Rosti, bizning madaniyatimiz, tarbiyamizni ko‘rib, ularning havasi keladi. Masalan, u yerda qaynona-kelinlik munosabatlari deyarli yo‘q, xohlasa, munosabat qilishadi, qilishmasa ham, bu oddiy holat. Bu masalada ularda ko‘proq kelinlar qaror chiqarishadi. Men xohlasam ham, turk kelin bo‘lolmayman. Bilsangiz, turklar qozoq, o‘zbek, turkman qizlar bilan turmush qurishga harakat qilishadi. Sababi bizda kattalarga hurmat boshqacha, go‘zal qadriyatlarimiz bor. Qaynonamning uch o‘g‘li bor, qizi yo‘q. Men xuddi onamga qiladigandek munosabatda bo‘lganim uchun meni o‘z qizidek qabul qilgan. Ikkita turk ovsinim bor, ular qaynota-qaynonam bilan bizchalik yaqin emas, bayramlarda ham qo‘ng‘iroq qilishmaydi. Shunday vaziyatlar bo‘ladiki, o‘zbek qizi ekanligimdan xursand bo‘lib ketaman, — deydi aktrisa.
Fotima Vohidova ilk marta “Anora” filmidagi qahramonining qismati hayotiga ko‘chgani va onasidan juda erta ayrilgani haqida gapirdi.
— “Anora”dagi qismatim to‘g‘ri kelib qoldi menga. Onam vafot etganlarida shu rolni o‘ynamasam bo‘larkan, deb qolgandim. Ustozim Rixsi Ibrohimovaga qo‘ng‘iroq qilib, onamning vafotlari haqida aytganimda “Anoraga o‘xshab qolibsan-ku”, deb yig‘ladi. Lekin Anoradek qiynalmadim. Otam va hozirgi onam yonimizda, lekin o‘sha hissiyotni yashadim. O‘tgan yili ukam ham jigar serrozidan vafot etdi, janozasiga kelolmadim. Unga ham opa, ham ona edim. Xabaringiz bor, Turkiyada qishda yer qimirlashlari ko‘p bo‘ldi, qizim ham kichkina edi, mendan boshqa odamga ko‘nmaydi. Yo‘l esa uzoq, shundoq ketib yuborolmasdim. Yana bir ukam bilan birga yashaymiz Turkiyada, u ham borolmadi. Lekin u yerda turib bo‘lsa ham, hamma marosimlarini o‘tkazdim. Taqdir ekan, ko‘nmasdan ilojimiz qancha. Onamdan yodgor ukam Oybek, Toshkentdagi ukamiz Behruzbek bor, baxtimizga ular sog‘ bo‘lishsin. Hozir hamma narsam bor, lekin onam va ukam yo‘q. Yaqinlarning borida qadriga yetish kerak ekan, yo‘qotganda kech bo‘lganini tushunib yetarkansiz. Qaynona-qaynotam ham juda yaxshi insonlar, bir onamni yo‘qotgan bo‘lsam, ikkinchisini topdim, deyman. Toshkentdagi onam ham samimiy, mehribon inson, lekin baribir qalbingiz kemtik bo‘lib qolaverarkan, — deydi Fotima Vohidova.
Suhbatni to‘liq holda tomosha qiling.
Izoh (0)