“Опа-сингиллар” сериалидаги Шаҳноза роли билан томошабинларга яхши таниш бўлган актриса Камола Арслонова ўн йилдан буён Туркияда яшайди. Турк йигити билан оила қурган собиқ актриса сентябрда фарзандлари билан бирга Тошкентга келди. “Дарё” мухбири Наргизахон Муродова уни интервьюга таклиф этиб, томошабинларни қизиқтирган кўплаб саволларга жавоб олди. Хусусан, Камола Арслонова айни кунларда нималар билан бандлиги, санъатдан кетишининг асосий сабаблари ҳақида очиқчасига гапирди.
— Айни кунда икки фарзандимнинг тарбияси билан бандман. Турмуш ўртоғим ишлашимга ёки ижод қилишимга рухсат берган тақдирида ҳам ҳозир бунга рози бўлмаган бўлардим. Чунки бор эътиборимни болаларимга қаратганман.
Санъат болалигимдаги орзум бўлиб, ҳамиша саҳна сари интилиш бўлган. Амаким Ҳошим Арслонов актёр бўлса-да, санъат олийгоҳи борлигини билмаганман. Онамнинг тавсиясига кўра, тиббиёт институтига ҳужжат топширганман. Аммо фикру хаёлим барибир санъатда бўлган. Таваккал қилишдан қўрқмайдиган инсон бўлганим учун иккинчи курсда тиббиёт институтида ўқишдан воз кечиб, санъат олийгоҳига ҳужжат топширганман. Айтмоқчиманки, санъатни пул ёки обрў учун эмас, дилдан хоҳлаганим учун танлаганман. Аммо она бўлгандан кейин таваккал қилолмас экансиз. Айниқса, тўрт йил фарзандли бўлолмай, тушкунликка тушган дамларимни эсласам, кўзимга болаларимдан бошқа ҳеч нарса кўринмайди, — дейди Камола Арслонова.
Собиқ актриса ижодда кўп бор алдангани ва сўнгги зарбалардан сўнг тақиқларга ҳам учрагани ҳақида айтиб ўтди.
— Шоу-бизнесда пул билан алдаш ҳолатлари жуда кўп бўлади. Аммо уларга эътибор бериб, санъатдан кўнглим совиб қолмаган. Шукр қиламанки, бировдан қарзим йўқ, мен билан ишлаганларнинг ҳаммаси хизмат ҳақларини олишган. Актриса эдим, шу билан бирга қўшиқ ҳам куйлардим. Шундай кунлар ҳам бўлганки, продюсер билан келишувни бекор қилганимдан кейин менга қандайдир тақиқлар қўйишган. “Унга рол берманг, ҳамкорлик қилманг”, шунга ўхшаш гап-сўзлар қулоғимга чалинган. Аммо осонгина таслим бўладиган қиз эмасдим. Тақиқлар бўлганида ҳам иккита фильмда асосий роллардан бирини ижро этганман, қўшиқлар яратганман.
Ижод ўз йўлига, аммо аёл киши учун энг муҳими оила эканлигини билганим учун турмуш ўртоғимнинг оила қуриш ҳақидаги қарорини рад этмаганман. Турк йигитига турмушга чиқиш хаёлимга ҳам келмаган, саёҳатга келган пайтда учратиб қолганман ва юрагим жиз этган. Айримлар ўйлагандек, турмуш ўртоғимнинг ёши катта эмас. Танишган пайтимизда бой-бадавлат инсон ҳам бўлмаган. Баъзилар ўйлагандек бойлик ёки мансаб учун у инсон билан оила қурмаганман. Ҳатто яшайдиган уйимиз ўзиники ёки ота-онасиники эканлигига ҳам қизиқмаганман. Мени фақат у инсон ва оилага бўлган муносабати қизиқтирган холос. Ҳозирги кунда фақат шукр қиламан, ўзимга яхши ёр, фарзандларимга меҳрибон ота танлай олганман, — дейди Камола Арслонова.
Эслатиб ўтамиз, Камола Арслонова Диёра тахаллуси билан ижод қилган. У “Опа-сингиллар” сериалидан ташқари, “Супер қайнона” фильмида Фаррух Соипов билан партнёр сифатида суратга тушган. У бир нечта қўшиқлар ижро этиб, клип ҳам суратга олганди.
Суҳбатни қуйида тўлиқ томоша қилишингиз мумкин:
Изоҳ (0)