Украинада 3000 нафардан ортиқ маҳкум армияга кириш учун ариза топширган. Бу ҳақда “Ukrinform” нашри Украина Адлия вазирлиги баёнотига асосланиб, хабар берди.
Украина адлия вазири ўринбосари Елена Висоцкая ушбу хабарни тасдиқлаган. Маҳбуслардан армияга кириш ҳақида талаблар келиши давом этаётгани билдирилган.
“Ҳозиргача 3 минг киши ариза топширди. Биз шундай бўлишини олдиндан билгандик. Олдинроқ мамлакатимиз расмийлари маҳкумларни армияга олишга рухсат бериш ҳақида қонун чиқиши ортидан 20 минг нафар ҳукм ўтаётганлар сафарбарликка олиниши мумкинлигини билдиришган эди”, — деган Висоцкая.
Украина расмийлари хабар беришича, маҳкумлар армияга олинишидан олдин улар билан ўз розилигига кўра шартнома тузилади. Жиддий ирсий ва туғма хасталиги борлар, оғир жиноят содир этганлар армияга олинмайди.
Шартнома асосида армияга олинган маҳкумлар мажбурий тартибда фронтга юборилади. Шартнома бандларини бузиб армиядан қочишга уринган маҳкумлар 5 йилдан ўн йилгача қамоқ жазосига ҳукм қилинади.
Маълумот ўрнида, жорий йилнинг 17 май куни Украина президенти Владимир Зеленский армия сафларига мамлакатни ҳимоя қилишга тайёр маҳкумларни жалб этиш тўғрисида қарор қабул қилган эди. Ушбу тартибга асосан озодликка чиқарилганлар шарқий мудофаа чизиғига юборилиши белгиланган.
Изоҳ (0)