Украина Қуролли кучлари 21 май куни Луганск вилоятидаги Россия нишонларига уюштирган ҳужум оқибатида 8 киши жароҳатланган. Бу ҳақда “ТАСС” нашри Россия Мудофаа вазирлигига асосланиб, хабар берди.
Манбада айтилишича, Украина кучлари асосан Луганск вилоятининг Свердловск шаҳрини нишонга олган. Шаҳарнинг турли нуқталарига серияли ҳаво ҳужумлари амалга оширилган.
Россия расмийлари Свердловск шаҳри кассетали ўқ-дорилар билан жиҳозланган ATACMS ракеталари ҳужумига учраганини, ҳужумда дронлар ишлатилгани ҳақида далиллар топилганини билдирган.
Донецк вилоятининг Россия томонидан тайинланган раҳбари Леонид Пасечник ҳужум оқибатида йўқотишлар ҳақида хабар берган. Бир қанча саноат бинолари шикастлангани хабар қилинган.
“Украина Қуролли кучлари Свердловскни ўққа тутишда АҚШда ишлаб чиқарилган кассетали ўқ-дорилар ташувчи ATACMS ракеталаридан фойдаланди. Оқибатда саккиз нафар фуқаро тан жароҳати олди, уларга барча зарур тиббий ёрдам кўрсатилмоқда”, — деб баёнот берган Пасечник.
20 май куни Украина уюштиргани хабар қилинган ҳужум оқибатида Свердловскдаги ёқилғи омбори портлаб, ёниб кетган. Ҳозирда ҳалокат оқибатларини бартараф этиш устида иш олиб бораётгани хабар қилинган.
Изоҳ (0)