Москва суди сочларини кўк ва сариқ рангга бўяган москвалик 25 ёшли Стас Нетесовни 50 минг рубль (тахминан 550 доллар) миқдорида жаримага тортди, дея хабар берди “Медиазона”. У Россия армиясини “обрўсизлантириш”да айбланган.
Апрель ойи охирида Нетесовнинг ўзи полицияга ариза ёзиш учун келган. У Москва марказидаги автобус бекатида ҳужумга учрагани, номаълум шахслар унинг тишини уриб синдириб, телефонини ўғирлаб кетганини маълум қилган.
Бироқ полициядагилар йигитнинг сочлари рангини кўриб, унинг ўзига қарши “армияни обрўсизлантириш” моддаси бўйича баённома туздилар.
Протоколда айтилишича, Нетесов “Украина давлат байроғидаги каби сариқ ва кўк рангга бўялган сочлари орқали визуал тарғибот воситасини намойиш этган” ва шу билан Россия армиясига салбий муносабат билдирган.
Шунингдек, хавфсизлик кучлари Нетесовнинг бармоқ изларини ҳам олиб, ҳарбий хизматга мажбурлигини унга айтиб, чақирув қоғози топширишгани ҳам маълум қилинган.
Нетесовнинг ўзи судда “на Украина режимини, на Россия Қуролли кучларининг ҳарбий мудофаа кучларини” қўллаб-қувватламаслигини ва соч турмаги билан ҳеч нарса ифодалашни истамаслигини айтди. У бир неча йил давомида сочларини турли хил ёрқин рангларга бўяб юрганини ҳам қўшимча қилган. Бироқ суд унинг бу гапларини инобатга олмаган.
Изоҳ (0)